《暫別》 (A Pause in Time)

This story came to me on a Eurostar with poor internet connection. I began writing it simply wanting to produce a light, uncomplicated love piece — a warm-up exercise after years away from writing. Then I came across this year's competition, and thought it was a good opportunity to force myself to actually finish it.

In the blink of an eye it is already 2025. When I left Hong Kong four years ago, I already sensed that "Hongkongers" would drift further and further apart. Looking at Hong Kong's current social atmosphere — the consumption habits of its people, the online debates between those who stayed and those who left — that fear seems now to have come true.

Countless works have already documented the pain of the past; of course there can never be enough material contesting the narrative of history. But as for the future — how should we, as Hongkongers, face it?

This story is quiet, and perhaps pitifully ordinary. Rather than saying it contains some grand moral, it is really just the imagination of a homesick person for a place left behind.

Original Work (原文)

《暫別》

〈她〉

我住嗰條邨話大唔大，話細又不至於，但最特別嘅係基本上入區嘅車都會經過我住嗰條邨。入區之前會經過一條都幾長嘅高速公路，通常大家都會瞓。可能因為條公路好直，一路到臨入區時先有個彎位，九成九嘅人都會係度瞓醒，所以呢個彎我哋居民會叫「醒覺彎」。

一到醒覺彎，同我住同一條邨嘅人都會起身，執下自己啲袋呀，捽下眼清醒下。邨口個站係成個區第一個站，通常架車有一半或以上嘅人會係呢度落車，落到車就再睇你行去邊頭。我住條邨就轉右，住其他邨嘅就轉左。過咗我住果度，就視乎係邊條巴士線，通常都係行多五、六個站就到總站。

我係對面海返工，日日都坐同一條線、同一班車。基本上，揀坐巴士過海返工嘅人，日日都係果班人。雖然話日日撞口撞面，但係大家無乜交流，上車都係瞓，所以其實都唔會認得大家，不過坐得呢架車嘅，多數都有一樣嘅訴求，一定係要過海辦事，好少有人區內就落車。我住入區第一個站條邨，調返轉即係出去前最後一個站，所以每日架車到我果站時已經好多人，逼到上車已經算係咁，然後就沙甸魚咁大家逼埋一齊，明明好疏離但又被逼好親密咁一齊上山下海。

有次排隊頭上車，一直行到入車尾，盡量縮細自己等多啲街坊上到嚟。好多時啲人為咗落車方便啲，都會唔行入車廂。以前會有人出聲話，但係近呢幾年大家都唔習慣講嘢，搞到好多時排隊嘅人都上唔晒車。出到公路無耐，我開始覺得有啲焗，慢慢重感覺到有少少暈，睇怕都係太多人搞到我有啲缺氧。我係街都暈過幾次，雖然知自己唔對路，但我驚人哋以為我扮晒嘢想坐，手又唔夠長將個冷氣出風口對正啲自己。我合埋眼想冷靜少少，慢慢深呼吸睇下自己會唔會好返啲。突然，有人拍一拍我膊頭，我迷迷糊糊見到個人係我面前起身，然後示意叫我坐佢個位。我無力抬頭睇佢生咩樣，淨係見到佢著粉藍色衫、黑色褲。我拿拿聲坐低，連講聲「唔該」嘅力都無。我估外人眼中嘅我，應該好似烈日下嘅貴族雪糕咁，一下子就溶到成灘嘢咁。同雪糕嘅差異係，我出咗汗，相信就算唔臭都一定唔會香。因為成個人都無力，個頭就直接撞咗落支扶手度，一秒就瞓著咗，等啲血慢慢上返腦。

有人話人類即使瞓緊覺，嗅覺都唔會休息。半睡半醒間，我唔係好聽到外面嘅聲，但就一直聞到有陣淡淡嘅香味。係一種入門嘅中性香水味，再加少少和國三合一洗衣球嘅味。「呢隻牌子好用，」我心諗「有隻包裝好似嘅其實係支國製，唔好中伏！」我都好佩服自己咁暈都重諗到呢啲無聊嘢。有暈過嘅人都應該知，有時暈完個人狀態好返啲，個腦會郁到，但係成個人都係無乜力，所以會一直合埋眼繼續唞（絕對唔係因為我覺得自己好樣衰先扮瞓）意識慢慢返嚟之後，我感覺到自己個頭隨住架車郁嘅方向而輕輕擺動，有時架車轉右，我個頭就會捱唔實支扶手，跌咗少少出去。每次跌出去，我都感覺到自己會掂到個墊，輕輕推返我個頭入去。個墊有少少彈性，唔會好軟但又不至於硬掘掘咁，而且重暖暖地好舒服。之後，我索性捱住個墊，而個墊就一直支撐住我個頭。

瞓多陣之後，我再醒返個人已經無咩事。聽到報站，架車已經過咗海，準備埋第一個站。

我微微打開眼，見到自己腳邊就係人哋嘅公事包。下意識縮一縮自己隻腳以免整到人。

眼尾哨到......咦，原來我捱住嘅唔係咩墊，而係企係我隔離位男士嘅側腰！我當下真係尷尬到無地自容......我即刻合返埋眼，再盡可能不動聲息咁將個頭嘅力收走，慢慢咁轉移啲力落本身捱緊嘅扶手度......

Oh shxt......屈指一算，我起碼拎人哋條腰當枕頭瞓咗半個鐘......由於太樣衰嘅關係，我只好繼續扮瞓，求神拜佛佢唔好同我同一個站落車。我順利捱返住條扶手之後，瞇起眼裝到佢個人輕輕向返後企，從我嘅視線範圍中離開。埋站之後，本身一直聞到嘅香味就唔見咗。我一路扮瞓，直到要落車時，亦都即係成條線嘅總站，我先慢慢打開眼。

好在，我身邊已經咩人都無，相信佢已經落咗車。

由於放工回程我係總站上車，基本上我次次都會上上層然後揀個唔太後又唔太前嘅位坐。自從嗰日之後，我會望下其他乘客個樣，睇下見唔見得返類似嘅恤衫。但係講真，大家著嘅返工衫其實都差唔多......我望咗幾日就放棄咗。有一晚夜咗收工，又加上係假期前一日，我就食埋個飯先返屋企。平時放工時間由總站開出嘅車，過幾個站就會坐滿上層。嗰晚食埋飯已經過晒繁忙時間，成架巴士都唔多人。返咗成個禮拜工再加飲咗酒，我好快就瞓著咗。瞓瞓下，我突然聞到一陣有啲熟悉嘅味......木質係主調，帶好輕嘅花香，加埋有陣洗衣球嘅人工香精味，夾雜一陣好微好微嘅汗味......係佢喇！

我即刻擘大眼睇下周圍，從車窗反映見到前面坐咗個男仔，著恤衫、唔肥唔瘦嘅中等身材，再加上佢嘅體香，直覺話畀我聽就係佢！佢戴住耳機，垂低頭攬住個公事包好乖咁瞓著咗。我盡情咁係後面偷望佢......短頭髮，輕輕有噴定型，戴眼鏡，個鼻好靚，無留鬚，白白淨淨皮膚幾好咁；唔係用airpod 估計唔係果粉，無耳環，左手無戴任何飾物，可見範圍唔見有紋身......我努力將佢嘅右邊面記入腦，有啲嬲自己飲咗酒，好驚自己聽朝起身就唔記得佢個樣。

隔住個窗嘅倒影望咗佢成程車，每次佢郁嘅時候我都即刻將視線飄走。試想像，你瞓瞓下發現身後有人係咁望住你其實都驚㗎嘛。佢將個公事包打直放係大髀，然後將半塊面埋咗入去瞓，好似個小朋友咁。過咗繁忙時間，架巴士好快就行到醒覺彎，架車轉左個幅度都搖醒咗佢。我收返自己貪婪嘅視線，拎起手袋起身準備行落下層落車。一路行，我只係希望自己唔好失平衡，同埋提醒自己盡量行得斯文啲，腳踭落地細聲啲。最重要嘅係，唔好忍唔住回頭望佢。

行到樓梯，落咗兩級，以我嘅高度，再行多級就會睇唔到上層。係最後一刻，我忍唔住偷望咗佢一眼，佢望緊窗外嘅風景。今次見埋佢嘅左面，同佢嘅右邊面一樣，一樣咁好睇。

我以前每日放工都好慶幸自己住呢條邨。雖然朝早返工都好逼，重唔一定上到車，但不論我係邊區返屋企，我都係最早落車，最早可以返到屋企。但係，今次我唔想自己住呢度。邨口停完站之後，架車重會經過好幾個站先到總站。咁多個站，到底佢係邊落車呢？佢住邊頭呢？佢係咪由細到大都住呢區呢？佢細個係咪都係呢區返學呢？佢讀邊間學校呢？會唔會其實我哋以前已經見過？

無可能。見過嘅話，我一定認得佢。

我望住架巴士愈行愈遠，簡直想自己有千里眼可以睇到佢係咪下個站就落車......返到屋企沖完涼，我摷勻全屋，終於搵得返同佢同款嘅香水。呢支香水可以話係對香味無乜研究嘅人必備入門款，基本上九成九嘅男仔噴佢都唔會出事。我好鍾意陣味，所以以前重係中學生時已經死慳死抵偷偷地買咗支返屋企，練完波就一定會係咁噴。雖然係中性，但街上遇到用呢隻味嘅都係男人，加上我之後氣管好敏感，所以我都無再噴喇。今日搵返出嚟，向個攬枕噴咗兩下。我努力回憶返佢個樣，聞住佢嘅味，慢慢瞓著咗，瞓到好似返到當日架巴士咁。

當你越想得到一樣嘢，有時你就會覺得同佢越嚟越遠。之後嗰個禮拜返工、放工、坐上層定坐下層，都見唔到佢......我同自己講，其實你都係想親口同佢講聲多謝喞，見唔到就算啦，或者人哋都已經唔記得咗你，畢竟好多女仔都試過係街度暈，都唔差在你一個......雖然每日我都抱住一絲見到佢嘅希望，但係我都有努力提醒自己，其實成件事好小事，咁大個人唔好咁多幻想。又或者，我只係太耐無感受到呢種嚟自陌生人嘅善意，唔想自己再一次後悔無親口講聲「多謝」。

然而，個天就係咁。係你差唔多要放棄嘅時候，硬係要畀啲機會你咁，好似唔畀你瞓醒，一定要繼續發夢咁。

雖然九成九嘅人會係醒覺彎瞓醒，但有時你就會咁啱做正唔識醒嗰個。

嗰日同支國總部嘅人開咗成日會，全日聽住啲唔係好聽得明嘅語言，重要努力擠出奉承嘅笑容，捱到放工時已經得返半條命。係總站上車之後，架車都未開我就已經瞓著咗。

到我突然醒返時，發現架巴士已經返到區內，埋咗站，落緊客。我即刻拎袋起身想衝落樓下落車。好死唔死，今日坐到好後，到我行到樓梯口已經聽到司機閂緊門。我跌跌撞撞咁落到下層，而架巴士都已經離開咗個站，駛緊去內線。搭過巴士嘅人都知，當司機扭咗軑，佢會再停車開門畀你嘅機會係零。咁當然，我都唔想阻住全車人返屋企，只係好懊惱自己瞓到唔知醒，而同一時間又覺得全世界都知我唔知醒又趕唔到落車有少少樣衰。

我轉身捱住輪椅位個軟墊，睇下時間考慮緊下個站落車再行返屋企好，定係坐到總站食埋嘢先返。正當我抬起頭時，我竟然同佢對上咗眼......佢企咗係車門隔離，捱住玻璃，同我對到正一正......我有啲驚喜，但又要一秒扮無事。移開視線之後諗起，佢企呢個位，即係頭先係搖滾區咁睇住我由上層半行半碌咁衝落嚟，而重要落唔到車嘅醜態？！Ohgod......我感覺到自己塊面好熱，應該紅到不得了......我唯有扮幾聲咳嚟掩蓋自己嘅驚訝同尷尬，順便合理化自己嘅面紅。我本身諗住等到下一個站就即時衝落車，但又諗，佢見到我完全無反應，睇怕已經唔記得咗我。既然係咁，不如畀自己睇多佢一陣，順便坐到總站係商場食啲好嘢定下驚好過。

我一直無意識咁㩒電話，眼尾就一路偷睇佢。佢今日著白色恤衫，深藍色西褲。佢對腳睇落都幾大，從我以前做過波鞋店嘅經驗睇，應該著44號鞋。佢對腳一直保持微曲嚟保持平衡，我部手機就剛好遮住佢個頭，粗略估計應該1米75左右高。佢無打機，只有聽歌，而佢會輕微咁隨住拍子郁動身體，感覺佢著T-shirt、短褲會更加自在。

我同佢一直企係原位，每個站落少少人，到咗總站成車人得返十個唔夠，包括佢。原來佢住總站呢頭......唔怪得知佢返工時會有位坐......

埋到站，我特登扮執嘢慢慢落車。我默默睇住佢落車之後行嘅方向，估計佢住邊個屋苑。佢行行下停低咗係間外賣壽司店度，揀咗一陣就拎起咗盒壽司去畀錢。睇個盒嘅大細，應該係８舊嗰種。

我無再跟上去，不然未免太似一個變態。再一次，佢消失係茫茫人海之中。而我，就隨便入咗間餐廳食飯。

〈他〉

畢咗業已經四年，每日過住返工、放工嘅社畜生活，每日坐車時我都諗，到底我係度做緊乜嘢？ 日日坐同一班車，行同一條路，做一樣嘅嘢。有時諗，我嘅人生係咪係嗰年就已經完咗。點解周圍嘅人好似都覺得生活無問題？咁有問題嘅，係咪我？

「早晨呀！」司機突然同我打招呼，令我打咗個突。

「......早晨。」

「我認得你啦，你日日都坐我車，坐咗五年幾喇！無呀，純粹話你知今日我最後一日返工喇。你聽日返工坐車就唔係我揸喇。」

「哦......係呀？點解嘅？搵到其他好路數？」

「係呀！我會搬去支國住呀！有個師兄話去到都可以揸返車，雖然變成單層左軚，但都係車嚟喞！聽講嗰邊人工高好多呀，咁咪去囉！」

「哦...原來係咁，有工開就好啦！」

「係呀係呀！你都加油啦！」

無諗過司機一直認得我，畢竟我只係云云乘客當中嘅一個。佢就唔同啦，呢個司機好好人，雖然佢可能已經唔記得，但佢其實唔止對我，佢對好多人講過加油。雖然而家佢係送我返工，但當年好多人都靠佢先可以安全返到屋企。諗諗下就唔記得咗上樓梯，咁就直接行到去車尾，揀個倒頭車位坐。好多人驚坐倒頭車，好似話會易啲暈車浪，但係我好鍾意坐倒頭車，因為望出窗外面時，我覺得可以望外面嘅景物耐啲，無咁一瞬即逝，而且我會覺得係我遠離緊啲景物，而唔係我想捉都捉唔住嘅感覺。

可能因為我少坐下層，覺得今日架車好似特別逼咁。望一望啲人，好在今日企最入嗰位小姐肯行到入車尾，唔係又唔知有幾多人要等下班車。坐坐下，我感覺企我隔離位小姐企到搖下搖下咁，我抬頭望佢，淡薄嘅脂粉掩蓋唔住佢嘅蒼白。係一班眼神空洞嘅乘客之中，辛苦到顰眉蹙頞嘅佢諷刺地顯得最有生命力。我拍一拍佢膊頭，將個位讓畀佢坐。佢一坐低就即刻合埋眼休息，纖長嘅睫毛禁不住抖動，對佢面頰而言過大嘅汗珠由髮絲間流落下巴。如果有氧氣畀佢聞一聞，或者抬高少少對腳，佢應該會舒服好多。但巴士咁逼，我都無能為力。佢可能真係好攰好暈，個頭係咁跌嚟跌去，架車一向前佢個頭就會向後撼落個扶手度，真係睇見都痛。我行前少少，等佢跌出嚟時可以捱住我個身，希望其他人唔好當我抽水啦。不過，應該都無人咁得閒理我做咩。

好在佢之後好似就瞓得安穩好多，面色都慢慢好返啲。不過我都就快要落車，猶豫緊點叫醒佢時，佢個頭咁啱就搖走咗，咁我就趁機欠身向後，準備落車。

嗰日全日心情都麻麻地，可能因為眼見又一個我生活中習慣存在嘅人又要消失。雖然聽日照樣會有司機大佬開工，我照樣可以坐七點半班車過海，但係每朝見到都會諗起嗰聲「加油」嘅人，原來已經唔同咗，又原來可以一下子就呢世都唔會再見到。諗到呢度，始終有啲傷感。考慮咗幾日，我決定請一個禮拜假，自己一個去咗轉旅行，希望可以搞清楚自己嘅諗法。

去完旅行返嚟，更加覺得要坐足一星期office 好攰、好壓抑，趁人少少就企係車門邊搭車。一邊聽住歌一邊繼續思考去向時，有個女仔連跑帶撞咁由上層碌落嚟，九成九係過咗站。佢落唔切車，就企咗係我對面。望咗佢一眼，覺得有啲熟口熟面，但為免佢尷尬，我就扮咩都無發生過，繼續聽我嘅歌。一邊聽一邊諗......呀！記得喇！佢係之前朝早係車唔舒服嗰個女仔。我隔住耳機都聽到佢有幾聲咳，唔知佢係咪身體好差呢？上次就見暈，今次就係咁咳。不過今日佢面色紅潤好多，無嗰日咁蒼白，咁就好喇。

落咗車，我就如常去買減價壽司做晚餐。幾年前未畢業臨時臨急同個莊員搬出嚟自己住，再加上嗰時有好多其他使費，特別係啲罐，又貴又唔慳得，所以其他嘢就要慳住使，就養成咗慳錢嘅習慣。雖然而家反而變咗無嘢要買，亦無乜物慾，但係我已經學識咗，無錢係身就好易畀人操控，我都好懷念當年話離家出走就離家出走嘅我。

同屋企斷絕來往已經五年，但係我一啲都無後悔。到咗今日，莊員已經去咗楓國，但我寧願自己家徒四壁，都好過返去嗰個「屋企」。

我其實由細到大同屋企人關係都幾好，特別係我阿哥。佢大我三年，做運動好叻，細個年年運動會都覺得阿哥好威，短跑一定拎第一。阿哥讀書就唔係幾好，偏偏我又同佢同一間學校，而我讀書又算唔錯，結果阿哥成日畀啲大人拎嚟同我比較，話佢要學下我勤力啲溫書。不過，嗰時大人嘅壞無影響到我哋之間嘅關係。阿哥中學畢業之後升唔到大學，諗住自己體力幾好就去咗當兵。而我呢，就考入咗馬大，做咗成個家族第一個大學生，阿爸阿媽同埋阿哥都覺得我好叻仔。阿哥係我大學開學禮時同我講「阿哥讀書無你咁叻，無你我都無機會入嚟大學行下。你同你啲同學都係叻仔嚟，將來靠你哋喇！」

就係佢呢句說話，令我覺得大學生有一份責任係身，所以除咗讀書、打下工之外，我都有去社企度返實習，又上咗支莊去幫啲工人爭取權益咁。

我嗰日出去，無同屋企講。因為阿媽一定好驚青，阿爸同阿哥又會叫我唔好去，係屋企涼下冷氣好過出去同人逼。講真我好鵪鶉，都係去坐下，湊下人數喞，根本唔會有咩危險，大學生無理由唔出去關心下。記得嗰日好熱，個個都熱到由頭濕到落腳。不過，出得去都無諗坐舒舒服服，大家都默默咁忍耐，坐定定聽台上講者發言。我諗住坐多陣就去附近商場廁所清潔下，換件衫就返屋企食飯。

突然間，周圍啲人開始有啲躁動。我都未意識到咩事，就聽到好大聲「嘭！」我唔知係咩聲嚟，只係下一秒，眼前就開始出然濃霧，空氣變到好混濁、好臭，我對眼覺得好痛，眼水鼻水係咁流出嚟。講台上嘅人叫大家冷靜，話軍隊開咗槍，叫大家疏散；同一時間叫軍隊唔好再開槍，我哋只係坐係度集會，而且已經跟規矩問准咗將軍。但之後，只係聽到更加多嘅嘭嘭聲，此起彼落，有時同時係兩邊都有槍聲。台上嘅人之後都講唔到落去，跌咗落地嘅咪持續發出高頻嘅尖叫聲。我同周圍嘅人一個拖住一個咁移動，無人知自己行緊去邊，無人知眼前嘅路安唔安全，我哋可以做嘅就係拖實前後嘅人，盲目咁相信對方。

空氣變得愈嚟愈混濁，我一直喘氣希望可以盡量吸到多一絲氧氣，但同時每吸一啖氣，身體嘅氧分反而好似少咗咁。我一邊跟住前面嘅人跌跌撞撞，一邊拖實後面嘅人。我驚我一放手，我哋就會失散於濃霧之中，從此消失。

彷彿行咗一世紀之後，我終於跟住其他人逃到一個商場。空氣中仍然充斥住令人窒息、反胃嘅氣味，我全身上下除咗汗水，眼淚鼻涕都流到成面都係；四圍都有人尖叫、嚎哭，亦都有人坐咗係度，粒聲唔出，表情呆滯；本來瑰麗堂皇嘅高級商場，坐滿咗劫後餘生嘅人，每個人嘅眼中都充滿住恐懼、震驚同憤怒。

人生第一次覺得自己距離死神好近，而眼前嘅景象令我相信自己已經身陷地獄。

「你流緊血。」

一把女聲將我拉回現實，低頭一望，我右腳有一大條血痕，啲血沿住小腿流落去，滲晒落我對襪度，親眼見到自己受傷，大腦先識發出「痛」嘅訊號。

「應該係頭先混亂中畀嘢𠝹到。我畀支水你，你沖一沖個傷口，之後再用卷紗布包一包啦。同埋你陣間去轉醫院安心啲。」個女仔擺低啲物資畀我之後，就轉身走咗。我見佢係度走嚟走去，幫唔同嘅人洗眼、檢查傷口；有啲人哮喘發作咁唞唔到氣，佢大聲問有無人有哮喘藥；有時就叫人塞個頭係個膠袋入面呼吸，佢係隔離教人逐下逐下「吸...呼...

吸...呼」。

我求其清潔吓個傷口，休息咗一陣，個人定返少少就開始搵路走。開頭係商場人太多，成日上唔到網；慢慢離開咗人群之後，先陸續收到訊息。其中莊員Group彈出一則寫：「啲軍佬癲撚晒，全部人嚟soc 房集合」。

我一路行一路睇電話，隻腳繼續滲緊血，而身上仍然有好濃嘅汗味，混雜住好似爛雞蛋嘅臭味，而頭先我身處嘅集會同商場，有好多影住嘅直播片已經放晒上網，網上個個都好嬲。我一路行一路行，行到去酒吧街，諗住搵巴士返馬大。抬頭發現周圍又變返多人，但呢度啲人好唔同，個個都著住老西擔住口煙，重有好濃嘅香水味。佢哋無經歷過我啱啱嘅災難。我好似入咗個異世界咁。頭先發生嘅嘢到底係真實，定只係一場夢？

嗰晚返去開會，大家都好震驚、好嬲，唔可以就咁算數，有個讀緊博士嘅師兄都返咗嚟一齊開會。

「無諗過咁快又會經歷多次，但上次佢哋都無癲到咁。」佢同我哋講下次再遇到催淚彈時要點做，又教我哋買咩面罩咩濾罐先夠用，重加句「千祈唔好畀佢哋埋到身，一定會畀佢哋打獲甘。」

之後我同啲莊員就去置裝備用，大家轉用 TG Group聯絡，基本上每次有活動都會有人出去。我一直無同屋企講我有參與，阿爸平時見我搞啲咩工人權益，已經話過我做乜唔專心讀書，係聽到我話多啲經驗識多啲人，出嚟搵工易啲呀佢先收聲。如果畀佢知我抽咁多時間出去，做埋晒啲無助我搵份好工嘅嘢，一定畀佢話我蹝時間。阿哥有晚食飯時講，軍隊入面嘅氣氛同平時好唔同。我問佢「你唔係準備升職，最近都坐office咩？」佢話「係呀，但都感覺到呀！」阿哥當咗兵都幾年，佢話擦傷都無乜點試過，覺得重舒服過細個練田徑。

有次活動我要私補完再去，諗住去到再同莊員會合。雖然我一直有裝備係身，但我好少留到最後，通常見勢色唔對就開始走，因為我真係唔想再經歷多次人間煉獄。嗰日活動好細，對比平時人算好少，我照樣諗住行一陣就走。

「嘭—嘭嘭嘭——嘭嘭」

咁快？！我已經知呢啲係槍聲，只係無諗過會咁早就開槍。我即刻係背囊入面拎防毒面罩上gear，希望起碼可以確保到呼吸同視線，咁先可以走到。今日參與人數唔多，槍聲同煙霧令人四散。穿過眼罩，我見到啲軍人突然間出現喺距離我二百米左右外嘅十字路口。我知道再唔走就好易出事，但係眼前有一班睇落中學生咁嘅年紀嘅細路，我大叫「走喇！太近喇！」佢哋先識得反應。有一個細路細細粒咁跑得特別慢，我上前拉住佢，扯住佢跑，佢背囊掛住支球拍，一路跑一路係咁打落我個身度。我聽到自己呼吸聲漸漸變得好重好急，同時聽到後面有愈嚟愈近嘅追趕聲。我好驚走唔切，亦都好驚帶唔走個細路，心跳得越嚟越快，內心諗住千祈唔好回頭望，只可以向前，一直跑、一直跑......

我拉住個細路去到一個商場門口，一下推咗佢入去，同一時間就感覺有人從後飛撲落我度，我個頭畀人好大力扑咗一下。我回頭一望，就見到好大支黑棍係我眼前，後面係一個著住軍服嘅人。正當佢舉手打算打第二下嘅時候，我同個軍佬對上眼，雖然我哋都戴住面罩，但係嗰刻我哋都好清楚對方係邊個。佢呆咗，然後本身壓住我嘅膝頭鬆開咗，我即刻爬起身，向前跑走。

無人估到阿哥最引以為傲嘅跑速，最後會用咗嚟追撃我。

當晚返到屋企，阿爸阿媽都已經知道發生咗咩事。佢哋係咁叫我唔好再出去搞事，我咁樣會影響阿哥升職。

「你癲咩呀？！有書唔讀，出去參加啲咁嘅嘢？！唔係次次都咁好彩撞正有阿哥救你㗎！」

「好彩？你哋知唔知啲軍佬做咩呀？！」

阿爸應聲一巴車落我度「我唔准你咁叫你阿哥！」

「......佢唔係救咗我呀！佢只係無殺我咋！我做咗啲咩？......我哋做咗啲咩？！如果今日佢捉到嘅唔係我，而係第二個，佢已經扑咗人哋個頭第二下、第三下......癲嗰個係佢呀！嗰啲都係人哋仔女嚟㗎！嗰度重有中學生呀！你哋明唔明呀！」

「你阿哥想㗎？啲暴徒唔搞事咪得囉！」

嗰一刻我覺得自己由二十樓嘅屋企，一下子升重跌咗落地底。我知道，再講落去已經無意義。由我親眼見到我阿哥打人開始，我無得再呃自己阿哥只係坐 office，佢雙手無沾血；由我阿爸阿媽親口話我出去搞事，叫我暴徒開始，我無得再呃自己佢哋只係政治冷感。我唔可以再留係呢個「屋企」。

〈我們〉

阿滔發現自己又陷入咗回憶當中，手心開始出汗，個人開始震。佢決定落街行下，唔想自己又跌入黑暗之中。雖然呢個城市細細，但係好多海，全個城市得一個區係完全內陸。阿滔求其著對拖街就落街，慢慢往海傍方向行。

佢行到去海傍盡頭，隨便揀咗張凳坐低，點咗支煙，用力吸咗一大啖。阿滔以前唔食煙，之後壓力太大，點支煙同班萍水相逢嘅同伴吹下水，會覺得所有嘢都變得無咁可怕。

「咳咳—」

「Sorry 我唔知有人係度。」阿滔即刻整熄支煙。

「唔緊要，我氣管唔好所以比較敏感即。」坐係阿滔隔離張凳嘅女仔話。個女仔邊講邊起身，柔和嘅黃燈打落佢身上，佢望住阿滔，眼神散發住掩蓋唔到嘅驚喜。

「咦～你係頭先巴士個女仔？你喺度嘅？」

「吓？！係...係呀...我食完飯嚟行下...嗨～」個女仔塊面又變到好紅，手好奇怪咁係半空揮一揮。

「唔好意思，我頭先無留意到你，所以先食煙。你無事呀嘛？」個女仔微微搖頭「我叫阿滔呀。」

「我叫 Ceci。」

尷尬嘅氣氛充斥住佢哋，Ceci 企咗係原地無郁，淨係望住地下。阿滔決定首先開口問「你身體無咩事丫嘛？見你今日咳，上次又頭暈咁...」「嗯？！你認得我？！」 Ceci 好驚訝咁抬高頭，本身已經圓碌碌嘅雙眼好似要跌出嚟咁。「係呀...之前朝早見你好唔舒服咁，之後重有無見暈呀？」「無喇...多謝關心。」Ceci 慢慢坐返低，不過向阿滔嘅方向坐近咗少少。

「我一直都想同你講聲多謝，上次係巴士好在有你讓座畀我，如果唔係我暈低咗就可能會阻到大家返工......」Ceci 無多謝阿滔畀佢捱住，佢驚阿滔以為自己特突唔起身抽阿滔水。

「哦，好少事即！你暈都諗住唔好麻煩人嘅。」阿滔微微一笑。

「咦，你隻腳受過傷？」Ceci 見到阿滔右腳上嘅疤痕，唔小心問咗出口。「係呀，幾年前嘅傷嚟㗎喇。不過嗰時無處理好個傷口，搞到生肉芽，不過唔緊要啦男人老狗。」

「關咩男人老狗事喎，我覺得受過傷無問題呀。你睇下，我都有撻𤶸㗎！」Ceci 隨手就拉低咗件衫領，露出上胸嘅皮膚。

「嘩！你收返埋先，人哋見到以為我非禮你呀！」阿滔嚇到即刻轉走塊面。Ceci 見到阿滔嘅反應，喞一聲笑咗出嚟。「使唔使咁驚呀？想畀你睇下我戰績即！」

阿滔雖然驚死擰歪面，但都睇到Ceci 心口上一個圓形嘅疤痕。「你......點整到㗎？」「哦～嗰時有次唔小心中咗彈，燒傷咗。哈哈，好在心口都叫有啲肉，淨係表面傷咗即。」

「喂！小心啲講嘢呀！」阿滔即刻細聲叫停 Ceci，再望下周圍有無其他人。

「咁大膽當街當巷講發夢啲嘢嘅你......」「唓！呢度得你咋嘛！驚咩喎～」「吓，你啱啱先識我咋喎，又知我信得過？萬一我係軍佬點算？」Ceci 忍唔住大笑話「你咁嘅身形喎？！你都無嗰個格！」阿滔幽幽咁講咗句「就算我唔係軍佬，我都未必係好人。萬一我係情報組呢？又或者我可能係監控隊嘅呢？知人口面不知心呀...」

「你係好人。」Ceci 收起笑意，好認真咁望住阿滔講「如果連幫過我嘅人都唔信得，咁我嘅世界會無晒好人。」

「好啦...咁...咁...咁無幫過你嘅就唔好亂信呀！其實我都係讓個位畀你坐即，稱唔上幫你啲咩啦。防人之心不可無呀，你都知周圍咩環境㗎啦......」

「你都係以前發夢整親嘅？」Ceci 打斷阿滔。

「嗯，算係啦，不過好早期整到，之後無咁唔小心。」阿滔有口話Ceci，結果自己都好似等唔切要分享咁。

「我都係第一次出去就中咗。嗰時同班同學第一次落場，聽講嗰日好少人，所以我練完波就直接衝咗去。行咗一陣就發現原來我哋企得好前。班軍佬又撞正嗰日好早就開槍，突然聽到嘭一聲，下一秒就覺得心口好痛，郁都郁唔到。好在嗰時有個哥哥拉走我...」

阿滔靜一靜，問「咁你嗰次走得甩？」

「嗯。好在有嗰個哥哥...佢帶到我去個商場度...」Ceci 耷低頭，開始好用力咁捽自己對手。「但係個哥哥好似畀軍佬捉住咗...我唔知佢下場係點...」「佢無事喎。」阿滔話「我都係咁同自己講...但係我睇住條跑得特別快嘅軍佬飛撲落佢度，個哥哥無戴頭盔...不過就算有戴都無用...最衰都係我......」豆大嘅眼淚一滴一滴跌落Ceci 手背，反映住暗黃嘅燈光。

阿滔起身，行去Ceci面前踎低，捉住Ceci對手，同佢講「我無事。」

Ceci 望住阿滔，深深吸咗一口氣，然後用盡全身嘅力攬住咗阿滔。「對唔住！真係好對唔住！我唔應該揼低你...好在你無事...真係好對唔住...原來我以前真係見過你，我竟然唔認得你...對唔住......」Ceci 攬到阿滔好實，眼淚一直流落阿滔嘅背脊度，不停咁道歉。

阿滔一手攬住Ceci ，一手輕輕摸Ceci 個頭，好似安撫緊一隻受驚嘅貓仔咁。「唔使對唔住，如果你嗰時唔走，我哋都會危險。總之我無事，我真係無事。我好開心你都無事。」阿滔細細聲安慰Ceci 。

Ceci 呢幾年嚟一直都好後悔當初無做準備就上戰場。一諗到當初素未謀面嘅陌生人，可能因為佢而畀軍佬拉咗，又或者當場就畀軍佬打死咗，佢就會好驚好內疚。之後每場戰役，Ceci 都好希望可以見返嗰個哥哥。但係上咗面罩，大家都差唔多樣；而且出親去都有唔同嘅生死關頭，Ceci 根本無餘力去搵個哥哥。

喊咗一輪，Ceci 終於平復返心情，阿滔起身坐係Ceci 隔離，問佢「所以除咗你生得細粒，你嗰時真係中學生嚟？！」Ceci 反駁話「咩細粒呀！我呢啲係標準身高！同埋中學生又點，嗰時有啲小學雞都出去啦！」阿滔內心一痛，無言以對。Ceci 見阿滔唔應，就問「所以，你係點走得甩㗎？」阿滔猶豫咗一陣，答Ceci 「其實...嗰個軍佬係我阿哥，所以我先要同你講對唔住，我先係對唔住全世界嗰個。」

「你屋企人係邊個，係天生嘅；你係邊個，係你嘅選擇。係我眼中，你就係一個好善良嘅人，係我嘅救命恩人。當年你救咗我，即使五年後今時今日嘅環境，你重繼續幫人。你屋企人係咩人，一啲都唔重要。」Ceci 轉身面對阿滔，好嚴肅咁講。

阿滔苦笑，眼角慢慢變得濕潤。已經好耐無同呢座城嘅人講起當年嘅事，佢亦係第一次同人講自己有個軍佬阿哥，甚至當年同莊員搬出嚟住，都只係話方便啲出去。有時佢會諗，到底呢一切係咪都係夢一場？當日係迷霧入面走難，係街上面奔跑，匿係大學soc房祈求軍佬唔好搵到自己，甚至穿梭係呢座城嘅地下水道入面；呢啲咁超現實嘅事係咪都只係發生係夢境，所以現實世界已經無人記得？所以大家而家會去支國搵錢，得閒淨係會去和國旅行，無人再睇新聞，無人再去幫人，無大學師弟妹接手繼續關注工人權益。

Ceci 呢番話好似帶佢走出咗一個洞穴，佢匿埋咗係入面好耐，一直都無人搵到佢，但係一個剛相識，或者話剛相認嘅人，一下子就係個洞穴度拉返佢出嚟。阿哥係軍佬呢件事係阿滔心中一條刺，而且以佢所知佢阿哥之後都有繼續自薦去前線，阿滔一直覺得好對唔住每埸戰役企係佢前後左右嘅人。阿滔而家返緊份平庸無聊嘅工，而佢阿哥就扶搖直上，做咗軍隊明日之星，而家啲大人擔心嘅，只係阿滔嘅存在會影衰佢阿哥。

「咁你嗰時多數打咩位？」Ceci 問阿滔。

「我開頭都只係諗住湊下人數，幫下手咁。之後見啲軍佬越嚟越無人性，都未拉返軍營就已經係條街度係咁打人，但係又唔夠人幫手救啲傷者，所以我之後主要做救援。」阿滔讀中學時有學過急救，本身諗住跟阿哥出去比賽時，萬一阿哥受傷可以幫到阿哥。

「嘩你知唔知嗰時好在有你哋咋！我有個朋友畀班軍佬捉咗，幾個圍住係咁打佢，佢畀人打到無咗意識。可能啲軍佬以為佢死咗就行開。嗰陣好在有救援隊救返佢，佢而家雖然有邊腳唔係好見使，但都叫行得走得丫。」

「咁你朋友都真係算好彩...唔係個個都咁啱畀人發現到。」

「係呀！隔離班就有個同學就無咁好彩...女仔嚟，畀人拉咗去軍營之後就無再出過嚟......老師都唔知佢去咗邊，佢啲屋企人淨係返學校帶走佢啲嘢就走咗。」Ceci 拉一拉身上嘅外套包實啲自己。「你唔問返我嘅？」

阿滔無奈笑一笑，問「咁你嗰時又打咩位多呀？」

「我打前鋒㗎！第一次出去就中彈係樣衰啲嘅...」Ceci 諗起眼前嘅阿滔就係五年前嘅哥哥，不由得又開心咗一下。「不過之後我會做好準備先出去㗎！我打網球真係好勁㗎，本身諗住做職業球手去打聯賽添㗎！嗰時我係條team入面就係負責打走啲彈，不過都因為咁搞到而家氣管好敏感囉。你唔好睇我細細粒，我一手可以抽返啲彈去軍佬度㗎！」

Ceci 講得興起，坐都坐唔住，對比佢雙眼散發出嘅光芒，面上稚拙嘅妝容顯得份外黯淡失色。

「咦？正話邊個話自己唔細粒？」阿滔笑問。 Ceci 鼓起泡腮擰轉頭扮嬲，阿滔見狀就話「你如果高大啲，我嗰時就扯唔郁你㗎喇！」

曖昧甜蜜嘅味道如糖衣般包裹住佢哋，矇矓嘅月色散落喺海面，隨住波紋泛成點點星光。呢一刻，二人歲月靜好。今宵多珍重。

「喂你知唔知呢度之前畫咗啲白海豚係地下？」Ceci 輕輕將頭輕靠喺阿滔肩上，感受阿滔嘅一呼一吸，可惜阿滔今日無噴到香水。

「我知呀，嗰時話要保護啲白海豚所以畫啲畫喺地下......真係人唔笑狗都吠。而家啲畫甩晒色無人理，個海都無晒白海豚啦......」「重有㗎！我之前係附近見過一條。」「如果得返一條，咁佢遲早都會死...以後嘅人都唔會知佢哋曾經存在過。」「或者只係匿埋晒唔畀我哋見喞！又或者佢有同伴係外面等緊佢呢？再唔係，我哋應承對方，要記住呢度曾經有白海豚，然後重要話畀其他人聽呢度曾經有白海豚！」「其他人care 咩？同埋咁樣講，咪隨時畀人話你批評軍政府？唔驚畀人拉呀？」

Ceci 無言以對，阿滔諗自己語氣係咪太重，於是拎部手機出嚟，將之前去旅行嘅相開出嚟畀Ceci 睇。「原來你之前去咗旅行！唔怪之得我日日係巴士都見你唔到啦！」Ceci 彈起身。「所以你之前日日係巴士搵我？」阿滔明知故問。Ceci 面一紅，耷低頭無出聲，阿滔繼續分享佢嘅旅行經歷。

「我去咗香港一轉。你知唔知邊度係香港？」「我有聽學校老師輕輕提過，但係我哋唔係唔可以去㗎咩？點解你去到嘅？」阿滔苦笑答「因為...我係軍人家屬...就算係三級禁地我都可以去。哈哈，呢個時候就認自己有個軍佬阿哥...」

「咁所以呢？你見到啲咩呀？啲人係點㗎？」Ceci 無打算畀阿滔又陷入傷感。

「香港好細，但係嗰度啲人好叻。佢哋廿年前先獨立建國，但佢哋金融同科技都好發達，唔似得軍政府同我哋講佢哋推翻咗政權之後就好窮，啲人好慘。佢哋而家有真正嘅選舉，小朋友係學校可以學香港歷史、香港話，亦都可以知呢個世界發生緊咩事。香港人話我知，建國一開頭都好混亂，但係大家就一齊學習民主社會應該點運作。雖然只係建咗國廿年，但佢哋話國家嘅嘢都慢慢變得穩定喇。」

「原來係咁...我都估香港唔係軍政府講到咁慘㗎喇！咁佢哋都有自己國旗，同埋國歌？！」Ceci覺得好難以置信。

「係呀！佢哋嘅國旗係全國投票揀出嚟㗎，不過唔會好似呢度咁周圍都掛住囉。」阿滔藐一藐每一條燈柱都綁嘅紅色旗。「同埋佢哋話就算播國歌，唔起立都無問題。但係嗰度啲人都好珍惜首國歌，佢哋話係香港人自己作㗎，由以前開始已經成日唱。重有呀，原來我哋都有唔少人流亡咗去香港。我哋啲同胞原來一直係嗰度搞唔同嘅活動，希望可以係外面籌組議會，成立流亡政府，最終目標係令到我哋都可以好似香港咁獨立，有屬於我哋自己嘅國。」阿滔望住大海，想像緊屬於自己嘅國家。

「你覺得有可能咩？我哋得咁細地方......」

「香港獨立之前，大家都話佢哋太細㗎，佢哋都做到啦！我哋重要大過香港喎！我覺得可以係一個出路，好過我漫無目的係呢度倒數人生......」

「所以，你諗住離開？」

「嗯...去完呢轉旅行，我好似搵到自己嘅使命，我唔想成世人都好似而家咁，咩都唔講得，咩都唔做得。你呢？如果有機會，會唔會想走？」

Ceci 望住個海，然後話「有啲白海豚重畀人困住咗，我要係外面等佢哋出嚟 —— 咁你諗住幾時走？」

「嗯...好快。」

「哈哈，唔怪之得而家啲人就算玩交友app都要首先講明會唔會走先啦！」Ceci 掩飾唔到佢嘅失落，雙眼又再紅起上嚟「咁你走咗，重會唔會返嚟？」

「係我成功嗰日，我一定會帶住榮光返嚟，呢度先係我嘅家。」

「咁...係你返嚟之前，我同其他海豚努力生存，唔會畀佢哋搞到滅絕。你就負責將我哋嘅故事帶到世界每一個角落，好無？」

「嗯。」阿滔用力點咗一下頭。「Ceci，我哋一定會再見㗎。」

「我都相信。五年前拉住我走嘅哥哥，我都可以遇返。今次，或者我要等十年？五十年？

但係，我哋一定會再見嘅。」Ceci 強忍眼淚，帶住微笑望住阿滔。

阿滔拉起 Ceci，用堅定嘅眼神向 Ceci 許下承諾「我應承你。」然後向前淺淺地錫咗 Ceci一下。

阿滔默默咁向後行，眼前嘅Ceci 同埋一片海變得越嚟越遠。阿滔又再一次喺 Ceci 視線中消失。

Ceci 回頭，彷彿見到海面上閃過一隻白海豚嘅身影。

我哋喺艱苦中初見，喺黑暗中暫別，最終將喺光明中再聚。

從前、現在、以至將來，要記住喺茫茫人海當中，同路人一直都在。或近，或遠。