《兵ＳＴＲＯＭＳ》 (Soldier Storms)

Soldier Storms is a Cantonese stage play with a fantastical adventure theme. The story revolves around three main characters — Fung, Lui, and Yu — who become caught up in a series of absurd and poignant events against the backdrop of a reported UFO landing. The script is presented in a non-linear structure with flashbacks, blending humour, tension, and complex interpersonal dynamics. It explores friendship, the contradictions between fantasy and reality, and uses stylised Cantonese dialogue to illuminate character.

Original Work (原文)

《兵ＳＴＲＯＭＳ》

編劇：仲奇

角色：

風：男，廿多歲

雷：男，廿多歲

雨：男，廿多歲

東張西望主持：女

序幕

（燈亮）

（雷出，倒敍的時間線，他有點躊躇，手拿著一罐藍罐曲奇盒。下定決心後，錄話音信息）

雷： （對著電話）接下黎我要講嘅嘢，你可能唔會信。如果你真係唔信嘅話，就當係一個故仔咁聽啦。一個關於做兵嘅故仔。（一頓，將信息刪除後，再錄）你要信我，我講嘅嘢係真架！我做過兵都係真，我而家都…（將信息刪除後，沉思，再錄）其實如果一早聽你講嘅話，成件事會好唔同。

（燈轉，雷放下藍罐曲奇）

（地點：據稱UFO墜落現場附近，全城關注，有人為此露宿）

（雷仔細看著現場，一會兒後電話響）

（雷接電話，細細聲的說話，最後對電話吻了吻才掛線）

（雷掛掉電話，用電話向著事件現場拍了張照後跑走）

（雷突然跑回來後躲起來）

（風出，戴著頭帶，身穿五顏六色的衣服，背上插著兩支旗幟，一支寫著：莫琪琪國際後援會，另外一支寫著：Love you forever, Maggie Mok!）

（風跑走）

2（雷待風跑走了一會才探頭出來）

（雨也探頭出來，原來雨一直在場但一直躲著風）

雨： 係呀，佢係阿風。

（雷看著雨，呆了半響）

雷： 雨仔。

雨： 行雷，好耐無見。

雷： 你同佢都喺度，啫係代表…

雨： 無錯，佢都喺度，你唔知咩？

雷： 我行過啫。

雨： 我仲以為你係為咗佢而黎添。

雷： 其實我好耐…

（風又出，雷雨即時躲起來）

（風覺得明明聽見人聲，但出到來看不見人，有點疑惑，又再走）

雨： 你哋兩個唔係好friend架咩，做乜避開人呀？

雷： 你哋friend啲。乜佢喺度咩？

雨： 你等我一陣。

（雨從背包拿出一個wifi發射器，放在雷手上，再拿出一個路由器，將發射器和路由器用lan線駁好，又拿出一部筆記型電腦，然後竟從電腦伸出一條天線，此時風又出來，雨從背包拿出一大塊布蓋著自己和雷，風看似是迷了路，慢慢又行走，過了一會，雨方將布掀開）

雨： 而家我哋面向緊邊面？

雷： 我點知呀！

雨： 你部電話入面有指南針。

雷： 係喎。

（雷拿出電話，雨瞬間搶走）

雷： 密碼…

（只見雨用鐵線在電話叉電位撬了兩撬，電話就發出解鎖的聲效，二人對望）

雨： 好，而家呢面係北面，咁啫係話…佢就係喺我哋十一點方向嘅一點五公里外。

（雷電話響起，走遠兩步接電話，細細聲的說話，最後對電話吻了吻才掛線）

雨： 我諗行十五分鐘左右就到。

（雷電話響起，走遠兩步接電話，細細聲的說話，最後對電話吻了吻才掛線）

雨： 我哋一齊去睇吓？

雷： 其實我趕住走…

雨： 你唔想見到佢咩？你知道我唔係講緊UFO架可？

（雷電話響起，雷下意識地把電話掛斷後呆望雨）

（燈暗）

第一幕

（燈亮）

（地點為UFO出現的現場附近，東張西望主持正在主持節目）

東： 今日帶大家黎到號稱係UFO，啫係不明飛行物體出現嘅地方，有好多市民都話喺呢度見到飛碟經過喎，而家現場聚集咗好多市民圍觀。咁究竟呢件事係咪真嘅呢？（雨雷走過）我哋即刻搵市民做個訪問！喂，先生…先生！

雨： 係？

東： 我想問吓你黎係咪睇飛碟架？

雨： 唔係呀。

東： …咁你呢？

雷： （掩著臉）經過見到呢條友，俾佢捉住咗過黎囉。

東： 咁你哋黎係做咩架？

雨： 搵我一生中最重要嘅…

雷： （掩著臉）黎感受下氣氛架啫！你睇吓呢度幾多人幾咁壯觀！

東： 好唔該哂你！從訪問得知，原來唔係好多市民係過黎睇飛碟嘅，佢哋大多數出黎只係因為朋友嘅壓力或者社會嘅大氛圍影響到架啫！（風跑過6，雷雨二人即時擰轉身）嗰邊好似有精神失常嘅飛碟狂熱者，我哋試吓去採訪佢！

（東隨風跑走）

雨： 你正話做乜唔俾我講嘢呀？

雷： 我無唔俾你講嘢呀。

雨： 你插我咀喎。

（雷電話響，雷掛掉電話，然後一臉驚慌）

雷： 無呀。

雨： …嗰晚你喺邊呀？

雷： 我喺屋企。訓訓吓教俾一下巨響嚇醒咗，我仲以為係地震。

雨： 我嗰陣喺街。真係好誇張，嘭一聲，個天好似中午十二點咁光。條街個個人都收唔到電話。嗰陣光散咗之後，對眼好似盲咗咁，乜嘢都睇唔到。到對眼開始適應到之後，一抬頭就見到好多星星，原來附近嘅地方都停哂電。

雷： 停電？我嗰邊無呀！

雨： 後來我上網睇返，係得我嗰頭有。

雷： 咁奇怪？

雨： 有人就估係嗰啲嘢經過。

（雷電話響起，雨搶過雷的電話按了一下按扭將電話還給雷）

雨： 如果你唔想人哋知道你CUT佢線嘅話你可以按側面個制，咁就可以無聲無震扮忙等佢自己收線。

雷： 唔該你呀。點解你識咁多嘢嘅?

雨： 我喺大學讀ENGINE架嘛。

雷： 咩ENGINE？

雨： 工程呀。

雷： 我知，但係邊科工程？

雨： 爆石工程。

（一靜）

雨： 不過你之前都已經CUT咗佢線，好似都係無乜用。你做乜唔聽電話？

雷： 我哋到未呀？

雨： 應該係…

（風出，雷雨二人立即躲起來，風本來快要走過，但走到一半好像發現有點不對勁又望回頭，然後又走開）

雷： 佢應該無你嗰啲科技嘢架，點解佢可以搵到呢度嘅？

雨： 你永遠都唔可以睇輕佢嘅直覺。

雷： 直覺？

雨： 就好似一隻喺雪地獨行嘅狼一樣，佢喺十里之外就可以聞到獵物嘅氣味，然後用奸狡無比嘅方法去務求不擇手段咁去獵食。

雷： 你講到佢咁勁，佢應該食到至係架喎。

雨： 弊在佢係一隻無牙嘅狼，俾佢追得上去都係有得睇無得食。

（雷雨二人大笑，風也出來一起笑，雷雨二人看見風立即想跑走，但被風捉住）

風： 我哋好耐無見啦。我都估到我喺度會見到你哋架啦，但估唔到會撞到你哋喎！

雷： 你UP乜呀？

風： 我意思係我知道會見到你哋，但唔知道會撞到囉。

雨： 見到同撞到有乜分別呀？

風： 嗱，見到就係咁（推開雷，看著雷）撞到就係咁（一下將雨撞在地上）。

雨： 頂你丫…

（風雨扭打作一團，雷將二人隔開）

風： 你同我走呀！

雨： 而家條街你架？

風： 你收皮啦，就算俾你見到佢又點呀？

雨： 唔通你見到就有用架喎？定係你又會走過去撞埋佢度呀？

雷： 你哋唔好咁啦，我哋都有好耐無見啦，唔好一見面就打交！我哋對上一次幾時見面？中學Last Day？

（三人聞言立即冷靜，灰機）

風： 你呢幾年去咗邊呀？我同呢個「雨頭」周不時都會見吓面，但你就真係好似唔見咗咁。

雷： 無呀，讀大學，畢業，搵嘢做，同普通人一樣囉。

雨： 咁你都可以搵吓我哋架？

雷： 傻啦，嚴格黎講，我哋連朋友都唔係。

風： 你又有你道理嘅，雨頭你係咪搵到佢啦？

雨： 死癲佬，我警告你咪再咁叫我啦。

風： 順口丫嘛，你個名又有個雨字。

雨： 你要知道我個雨字係落雨個雨，係好有文學意境，好靚架。

風： 靚雨頭。

（雷在風雨談話期間，拿出電話查看）

雷： 其實我有啲嘢做，不如下次…

雨： 佢喺三百米之內，咁近嘅話我哋應該見到佢架啦喎。

風： 行雷你話咩話？

雷： 無嘢啦。

風： 係咩…會唔會喺嗰面啲人群入面？

雷： 咁多人圍住，好難搵架喎。

雨： （拿著望遠鏡）係囉，真係好難搵架喎。

風： 我搵到啦！

雷雨： 邊度？

風： 見唔見到前面中間第三行右手邊第八個女仔？

雷： 你又知係佢？

風： 我認得佢波邊粒墨。

雷： 波邊粒墨你都知？

雨： 呢方面我唔會質疑佢。呢個死變態成日都J佢。

風： 你唔J嘅。

雨： 講過好多次，我係唔會J佢嘅。唔該你都唔好沾污佢，我知你成日抽佢水。

風： 喂，唔通有水唔抽咩？而且唔通你就唔變態啦咩？咁快掌握到佢嘅位置，你肯定係幫佢整電話嗰陣偷偷地裝咗跟蹤器啦。

雨： 哈哈哈…你對科技實在太唔了解，要知道電話係有全球定位功能，我只係將bookmark咗佢個ip從而得知佢位置啫。

雷： 點解你哋仲可以為佢做咁多嘢？

風： 咩呀？

雷： 自從嗰日之後？

雨： 有咩問題？

雷： 見到啲咁嘅嘢喎？

雨： 咩嘢呀？

雷： 喺後山！

雨： 後山？

雷： 你都喺度架喎！

雨： 完全唔知你講咩。

風： 我知你想講咩，咁又點丫？

（雷電話響）

雨： 聽電話啦。

雷： 我聽唔聽唔關你事。

風： 推銷電話黎架？

雨： 唔係。佢頭先話唔係。

（電話響完）

雷： 我真係唔明，點解你哋可以當無嘢發生過咁！

風： 好簡單啫，因為我鍾意佢。

雷： Last day嗰日喎！

雨： 我唔明點解你咁嬲喎。

雷： 喂，點唔嬲呀？我哋個個當佢係女神，嗰陣喺中學有功課第一個借俾佢抄，小息仆去幫佢買嘢飲，放學輪流孭書包。喺Last Day嗰日，佢俾啲咁嘅嘢我睇？

雨： 嗰日做咩呀？

雷： 你真見唔到定假見唔到呀？你第一個衝出黎架喎！

雨： 我咩都見唔到。其實中學畢業之後係會令人疏遠咗嘅，我都有一排無同佢聯絡，但之後佢電腦壞咗叫我上去同佢整，佢又無乜嘢咁，原來其實真係無乜嘢囉。

風： 我OK架，as long as佢對波唔墮，我哋嘅關係都唔會改變。

雷： 所以你哋咪係兵囉！

風： 係兵又點啫？我做兵都OK架喎，都做得幾happy呀！

雷： 你睇吓你個樣？插支咩嘢旗喺背度？成個傻佬咁，做兵做到你痴咗線呀！

雨： 你冷靜啲先。

雷： 點解你哋仲可以喺佢身邊，好似烏蠅咁嬲黎嬲去？

風： 你係咪妒忌我哋仲可以留喺佢身邊呀？

（一頓）

雨： 你做乜唔聽你女朋友電話？

風： 屌你丫，你有女朋友？

雨： 我正話解鎖你電話嗰陣見到，你唔好介意。同埋，你好似好驚佢咁。

雷： 我只係尊重佢啫！

雨： 咁點解你依一刻會選擇留喺度，唔返去？

雷： 我只係想當睇吓個舊相識點樣啫。

（雨遞望遠鏡給雷，示意雷拿去望一望女神，雷拿著望遠鏡望了一會）

雨： 見唔見到？

雷： 扎馬尾嗰個？

風： 係呀，紅色髮圈，小背心，打出半對波，波邊有粒墨嗰個。

雷： 見到啦。

雨： 有咩感覺？

雷： 佢無咩點變，係化咗妝，同我…

風： 同你咩？

雷： 無嘢。

雨： 係咪同你想像中一模一樣？

雷： 嗯。

（雨搶走望遠鏡）

雨： 好啦，咁你而家睇完啦，你可以走架啦。走啦！

雷： 我…

雨： 我哋會行近啲默默守護佢，你有女朋友又唔係兵無乜必要留喺度。

（雷望一望兩人，點點頭離去）

風： 你點解要咁樣啫？我哋「兵Storms」咁難得先至眾首一堂，你又趕人走。

雨： …你改名真係好差，如果你有機會結婚生仔你千祈要俾你老婆改名。

風： 第一，我哋三個都係兵，又風又雨又雷咁Storms，叫兵Storms係非常之咁合符邏輯嘅。第二，如果我結婚就啫係同琪琪結啦，我係一定會俾佢幫BB改名，你放心。

雨： 痴線。

風： 你夠係囉。

（二人一靜）

雨： 少一個人痴線，總好過多一個人痴線嘅。

風： 咁又係。

（雷回來）

風： 你又返黎做咩呀？

雷： 我電話突然無Signal，想睇吓你哋收唔收到。

風： 收唔到。

雨： 收唔….到？

（UFO突然出現，風雷雨看著UFO目定口呆，UFO停在女神所處人群的上空，吸走人群）

雷： 屌那星，隻飛碟吸緊啲人走呀…

風： 琪琪呀！

（風想衝向人群，雷雨把他拉住，混亂間雨被UFO氣壓吹起的石頭擊中頭部）

雷： 雨仔你點呀？我哋帶佢走先啦！

（風依然不走，雷只好帶雨離場，風嘗試過前進但失敗）

風： 琪琪你放心，有我喺度無人可以郁你！

（燈轉）

（回憶的片段：風在準備要禮琪琪的禮物）

（穿著校服的雨跑入）

雨： 過黎幫拖呀！琪琪俾隔離學校啲仔圍呀！

風： 咩話？琪琪你放心，有我喺度無人可以郁你！

（二人跑走，燈轉）

第二幕

（燈亮）

（倒敍時間線，雷繼續錄話音信息）

雷： 我都唔記得咗我點樣秤住雨仔走，亦都唔知阿風嗰個痴線佬嘅下落，更加唔記得我點樣返到屋企。之後嘅嘢我諗你都好清楚，所有人都好清楚。政府因為安全理由開始實施宵禁，雖然佢哋一直都無公開做成唔安全嘅原因係咩，無論咩嘢人問佢都好，佢哋都唔肯正面回應，一貫作風丫。喺消息仲未封鎖之前，陸續都聽到有人俾UFO吸走，慢慢就連UFO、不明飛行物體、飛碟呢啲字眼都唔俾人搜尋。就喺一個咁嘅時候，我俾阿風拉咗入一個叫兵Storms嘅whatsapp group，入面仲有雨仔，得我哋三個。呢條友改名真係好難聽。佢約咗我哋喺一個地方等。母校後山，佢話佢喺嗰度起咗個秘密機地。

（燈轉）

（雷走入秘密機地，周團都擺著與莫琪琪有關的物品）

（風入）

風： 當係自己屋企咁就得架啦。

雷： 呢啲嘢…

風： 全部都係琪琪嘅嘢，譬如佢中三嗰陣用過嘅Maths書啦，佢收過嘅禮物嘅花紙啦，嗰邊就擺咗佢去旅行嗰陣喺酒店用過嘅即用即棄梳。

雷： 唔係應該即棄咗架啦咩？

風： 係呀。

（一靜）

雷： 呢度十足十一個邪教總壇咁。

風： 係呀，我諗住等救返琪琪之後就喺度成立莫琪琪國際後援會第二分部。

雷： 我完全唔想知道個總部喺邊。你話救返琪琪？

風： 係呀，所以我先約你同雨仔過黎之嘛。嗱其實我諗好架啦…

雷： 咪住！不如我哋等埋雨仔先啦。

風： 其實我諗，佢未必會黎。

雷： 吓？

風： 我諗佢受唔住。

雷： 但佢都好鍾意琪琪架喎？

風： 佢係好鍾意佢，但佢其實同你一樣咁鍾意逃避。甚至仲可能避得勁過你。

雷： 咩逃避呀？

風： 嗰日你見到琪琪同Jason喺度…嘅時候你有咩反應丫？

雷： 咩話？喺度？

風： 係呀，唔係點解我要喺度起秘密機地啫？

雷： 屌丫！

風： 你答咗我問題先啦。

雷： 我咪跑走囉！你都…唔係喎，你無跟我跑喎。你之後去咗邊？

風： 我留咗喺度睇到最後。

雷： 你真係痴線架…你無反應架咩？

風： 有呀！我打咗個…冷震，可能係因為嬲或者驚俾佢哋發現啦。但我同你哋唔同，我會勇敢咁面對佢嘅不同。佢同我想像中嘅唔同。

雷： 雨仔唔係都係咁咩？佢話佢之後都有幫佢整電腦嗰啲架。

風： 佢之後有九個月無搵過琪琪，直到琪琪嗰個叫佢整電腦之前，佢直情當佢死咗咁。比你過往嗰幾年更加逃避。到佢地兩個聯絡返啦，又扮哂咩事都無發生過咁。

雷： 睇落又唔似喎，我估佢會黎。咁佢黎到我就可以走啦，因為我根本就已經對莫琪琪無哂感覺，我已經有女朋友架啦。

風： 咁你又黎做乜呀？

雷： 禮貌上舊同學約我都要蒲一蒲頭嘅，順便睇吓你點啫。

（雨入，包著頭）

雨： 唔好意思，我遲咗少少。

雷： 嗱，係咪呀！咁我走先啦，得閒飲茶啦。

風： 你咁就走嗱？

雨： 係囉，你唔好走住啦，我有嘢想同你哋講。

風： 你都有嘢想講？

雨： 自從嗰日之後，我做咗好多資料搜集，你哋睇吓！

（雨派給風雷一人一份資料）

風： 咁多字嘅。

雨： 簡單黎講，你哋知唔知道乜嘢係太陽粒子？

雷： 唔知。

雨： 陽光折射到啲太陽粒子度就會發生散射，令到黑夜都有會極光！

風： 所以呢？

雨： 仲有！聲音係可以傳得好遠架！我查過架啦，我哋嗰日嗰度其實附近有十幾廿個地盤包圍住，其中有八個係會喺夜晚做嘢嘅。

（風雷二人搖頭）

雨： 水星逆行！受到水星逆行嘅影響，有機會同時間影響一大班人嘅思想！

雷： 你究竟想講咩呀！

雨： 其實你哋有無諗過，嗰晚發生嘅事只係一場集體幻覺？

風： 幻乜撚嘢覺呀。

雨： 可能係同時有幾個現象出現咗，而之前UFO嘅傳聞又根深蒂固，所以就令到我哋聯想到有UFO出現啦！而其實！嗰晚係無UFO出現嘅，只係我哋同時間嘅集體幻覺！

風： 你係咪痴撚咗線呀！

雨： 你就痴線。我上網睇到好多人都係咁樣諗架，連都市閒情都係咁講。

雷： 咁無啦啦無咗幾百人你又點解釋呀？

雨： 好問題！其實我哋見到嗰啲人，好有可能都係幻覺黎架咋！

有啲嘢你成日諗住諗住，最後就會見到架啦，你睇吓周圍，全部都係同一個女人嘅嘢，你成日諗住佢，自不然就以為自己見到佢啦，加上水星逆行令到你嘅思想錯亂，所以你就以為自己見到佢啦！

風： 你嗰晚都話見到佢架！仲有行雷都係！

雨： 佢咁耐無見過我哋，一見到我哋自然聯想到佢，再加埋你喺隔離推波助瀾，佢咪以為自己見到囉！實際上佢咁多年無見佢，又邊有可能一下子就認到佢先，你話係咪？

風： 但係在場仲有幾百個人喎！

雨： 咁你記唔記得佢哋係咩嘢樣丫？

風： 我點會…

雨： 咁多人當中係咪得莫琪琪個樣最令你深刻丫？

風： 咁緊係…

雨： 因為佢哋全部都係你幻想中嘅人，所以你諗得最多嗰個就最清晰，其他就唔記得，你話係咪？

風： 行雷，你出句聲。

雷： 但係…但係好多人喺嗰度，又扎哂營咁架喎，唔通佢哋都眼花？

雨： 首先係因為謠言，所以好多人聚集，然後因為太陽粒子，水星逆行，加埋環境因素令到我哋集體發生幻覺。

雷： 在場走得甩嗰啲人…

雨： 嗰啲人一齊發生幻覺。

（一靜）

雷： 你用咗幾耐搜集呢啲「情報」？

雨： 由嗰一晚開始。大概三個禮拜啦。

雷： 你足足用咗三個禮拜搵呢疊嘢出黎去說服自己你嗰晚見到嘅嘢唔係真嘅？

雨： 大膽假設，小心求證啫。

雷： 咁如果我大膽假設其實我哋嗰晚見到嘅先係真，真係有UFO…

雨： 唔會囉！好地地點會有UFO？

風： 無嘅話點解政府要喺網上面Block撚咗呢啲字呀？

雨： 因為我哋嘅集體幻覺已經做成咗恐慌啦，為咗制止恐慌，政府緊係要做啲嘢啦！

風： 咁你個頭呢？

雨： 我個頭？

風： 你個靚雨頭受左傷喎！

雨： …翻風啫。喂！其實我今日可以唔黎架！我黎係出於好意想點醒你哋啫！廢事你哋再做埋啲嘥氣嘅嘢啦！

雷： 例如啲咩？去救莫琪琪？

（一靜）

風： 你係咪驚呀？（意指雨頭的傷）

雨： 幻覺黎架啫，嚇我唔到嘅！

雷： 你知唔知佢而家喺邊？

雨： 我點會知呀？

雷： 你唔係可以Search到佢電話個GPS架咩？

雨： 你有一排搵佢唔到啦喎。可能佢部電話壞咗。

雷： 有幾耐呀？

雨： 三個禮拜。

（一靜）

雨： 嗱嗱嗱，你千祈唔好亂諗嘢，佢電話個GPS消失咗，同埋我哋嗰晚嘅集體幻覺純粹只係巧合黎架啫！唔好諗多咗。

風： 我真係廢事同你癲，總之你哋聽我講，我哋一齊去救佢。

雨： 我哋又點救一個根本唔需要救嘅人呢？

風： 我喺地下網絡搵到嗰晚都喺現場嘅人，有啲人都有身邊人俾飛碟吸走咗，我哋研究緊點樣可以追蹤飛碟，救返佢哋！

雨： 你咪癲啦，根本就無飛碟。

雷： 俾你哋搵到飛碟又點？連飛碟都出埋，你夠佢打咩？

雨： 咪係囉！同埋嗰度好大風架喎！（指一指自己的頭）

風： 我唔知，但我唔會喺度坐以待斃。我要救返莫琪琪。

雨： 都話咗唔洗救囉，佢根本就無嘢。

風： 咁佢而家喺邊丫！

（一靜）

雨： 唔知。

風： 喺呢十年黎，我同你第一次唔知佢喺邊。以前中學放學佢一支箭咁走咗，我哋都知道可以喺麥當勞搵到佢。到大學就算唔同系都知度佢喺邊個podium打等，甚至乎佢俾UFO吸走嗰晚我哋都搵到佢。第一次，第一次真真正正咁失去咗佢。

（一靜）

風： 咁你係咪決定唔理佢丫？行雷呢？

雷： 如果係救一個舊朋友嘅話，我完全無問題嘅…如果我得閒嘅話。

風： 我明嘅，你條女又係難搞啲，奪命追魂call咁。點解今日咁好唔響嘅？

雷： 我較咗震機。（拿出電話，電話狂震）

風： 咁你呢？

雨： 唔係第一次。

風： 咩話？

雨： 唔係第一次失去佢。嗰日Last Day，大家都見到。

雷： 你又話見唔到嘅？

雨： 我係第一個見到，嗰日就喺呢度，學校後山，莫琪琪同埋籃球隊男神Jason，就喺呢度。打野戰！

風： 屌唔好再提啦！

雨： 唔好提？喂，我一直以為你好豁達架喎。連個機地都起喺度，你唔係乜嘢都overcome到架咩？喺我哋三個當中你唔係最撚正面嗰個咩？咁多年我都唔明，除咗我扮睇唔到之外，點解你仲可以一直喺佢身邊？喂，佢喺度同第二個男人扑嘢喎！除咗喺度佢一定會喺唔同嘅地方同唔同嘅男人做愛。嗰啲男人可能全部都同Jason一樣咁大隻，大隻到可以抱起佢黎屌。知唔知咁樣代表咩？代表住你永遠都無行呀！仲話要救佢？你話你第一次失去佢？我哋根本從來都無擁有過佢！你仲想為佢做咁多嘢？你咪戅鳩啦！

（一靜）

風： 換句話講你啫係驚啦。算啦行雷，我哋拍住上！

雷： 我有機會會幫手，不過我女朋友未必想我走得咁前。

（雷走）

風： 你真係唔黎？

雨： 總之呢啲嘢做黎都嘥氣，我唔會做。

（燈轉）

（回憶片段：雨在準備禮物）

（穿著校服的雷入）

雷： 弊啦！我收到風，隔離學校班仔諗住今日放學僕琪琪呀！

雨： 有幾多人呀？

雷： 無十個都八個！我哋一齊去保護琪琪啦！

雨： 咁多個點打呀？

雷： 唔保琪琪佢就會俾人搶走架啦喎！

雨： 總之呢啲嘢做黎都嘥氣，我唔會做。

（雷走）

（燈暗）

第三幕

（倒敍時間線，雷繼續錄語音信息）

雷： 嗰日之後個whatsapp group沉寂咗一排，但無幾耐之後就得返阿風同雨仔出聲。

（燈轉，去到whatsapp group視覺化的空間）

風： 今日我哋開始行軍。

雷： 去邊呀？

風： 要落區拎數據。

雨： 記得今晚睇東張西望呀，佢有講集體幻覺嘅嘢！

雷： 哦，有時間就睇吓。

（燈轉）

ＶＯ： 最近民間熱話，集體幻覺呢個話題鬧得熱烘烘，我哋即刻搵我哋嘅主持體驗一吓！

（東張西望主持蒙著眼出現）

ＶＯ： 我哋首先俾啲人聲佢聽吓！

（人聲效）

東： 呢度係咪有好多人架？

29ＶＯ： 我哋再睇吓佢心跳幾多。

（東聞言後摺起衫袖，露出手帶）

ＶＯ： 嗯，佢嘅心跳快咗好多，係進入集體幻覺嘅先兆！

（動物聲效）

東： 點解突然咁多動物架？我好驚呀！

ＶＯ： 你可以除低眼罩啦。

東： 咦？乜都無嘅？但我正話真係感覺到好多人同動物圍住我架喎！由我親身體驗之後，集體幻覺係真係存在嘅！

（東離開）

（燈轉）

風： 嘩你咁都信？睇得多因住睇壞腦呀！

雷： 都…幾有娛樂性架喎。

（一靜）

風： 我哋呢支軍隊分咗好多唔同嘅兵種，有錢嘅我叫佢做水兵，有車嘅係坦克，有飛機嘅叫做傘兵。

雷： 飛機都有？

風： 航拍機。

雨： 記得今晚睇東張西望呀，佢有講思覺失調嘅嘢！

（東走入來）

雷： 呢個…我無乜興趣。

（東白了雷一眼後離開）

雨： 但我哋之間有人有需要睇呢。

（一靜）

風： 今日我哋喺街頭擺咗個攤位，有好多市民簽名支持我哋，仲覺得真係有飛碟存在！

雨： 都有人以為尼斯湖水怪存在！

風： 唔該你乜嘢都唔做就唔好成日喺度潑冷水啦！

雨： 我今日睇咗本書，叫做《徒勞無功的事就不要做》，我高度推薦俾你睇，算唔算做咗嘢呀？

（一靜）

雨： 今晚東張西望理性分析有關集體幻覺成因，仲請埋司徒法正由堪輿學嘅角度去睇吓UFO喺人腦嘅心理上有咩象徵意思。

雷： 司徒法正唔係打鬼架咩？

雨： 可能佢兼職掛。

風： 好心你就唔好睇死一個台，接收多啲唔同嘅資訊啦。成日睇佢遲早睇壞你個腦。

雨： 我有睇第二個台架，仲見到你拉住Banner出黎添。

風： 咁你都認到？

雨： 緊係啦，東張西望都無打格仔。

（一靜）

雨： 其實你哋有無諗過，莫琪琪呢個人好可能根本就唔存在，咁多年黎只係我哋FF呀？

風： 你喺度講咩呀！

雨： 啫係佢只不過係我哋心目中美好完美女人嘅投射，根本就唔存在喺現實，只喺我哋個腦入面。我睇咗好多書架啦，佢出現係為咗補足我哋心目中對於女性嘅追求，簡單啲黎講就係精神寄托。就好似宗教入面嘅神咁。係啦，所以我哋就叫佢做女神！佢從來都係幻覺！因為我長大咗啦，所以我就再搵唔到佢，一定係咁。你都唔好再搵佢咁嘥氣啦。

風： 你係咪食錯藥呀？你仲記唔記得當年我哋為咗接近佢做咗幾多嘢？又等佢放學又請佢唱K，幫佢抄功課，通宵排演唱會飛。你會上去幫佢整電腦，佢出街啲洗費永遠都係我俾…

雨： 喺呢本書入面有好多案例係講我哋會有妄想啲唔存在嘅嘢令到我哋嘅覺得生活易過啲，就好似細個嗰陣嘅幻想玩伴咁，咁大個咪有性幻想玩伴囉！不過我哋又唔滿足於單純性愛嘅幻想，所以就好認真懶現實咁幻想咗個真人出黎啦！所以你講嗰啲活動好可能係得我哋幾個自己做…

（風雨二人吵架，有時會疊聲）

雷： （拿著電話）我諗大概就係呢個時候，我真係頂唔順。（拿著手機對著風雨按了一下電話，風雨二人無聲吵架）我mute咗個group。其實我就真係好想quit group架啦，畢竟有無飛碟都好，琪琪係真係假都好，對於而家嘅我真係唔重要，我對於現狀好滿足丫！但亦都無必要去否定人哋嘅信念，我就係一個咁體貼嘅人。有一排無理個Group啦。過咗排再睇返，我發現好幾日都無人出過聲（風雨二人停止吵架），而最後一個voice message，係阿風留嘅）

（光線慢慢集中在風身上，只穏約見到雨雷的身影）

風： 我哋根據收集到嘅數據，知道飛碟出現嘅條件，第一，一定係夜晚；第二，會令到附近十里停電；第三，會令到附近區域收唔到電話訊號。跟隨住呢三點線索，我哋大概紀錄低佢出現過嘅地方同埋pattern，然後再預測佢哋下次出現嘅時間地點。今晚，我哋就會嘗試接近佢哋。

（風慢慢接近飛碟，飛碟的強光掃過風，風定格）

（燈暗）

第四幕

（秘密機地內）

（雷在查看機地內的東西，雨入）

雷： 仲以為你唔會黎添。

雨： 我又唔係真係咁難約。有無佢消息？

雷： 無。但我覺得佢今日一定會出現。

雨： 我都係咁諗。

（一靜）

雷： 呢條友真係收埋好多嘢喎。好多唔等洗嘅嘢。

雨： 係咩？呢啲都算係我哋青春嘅紀錄黎嘅。

雷： 係呀，嗰時真係好青春。

雨： 真係唔知嗰時我哋點可以整到咁多嘢出黎。

雷： 咁因為我哋嗰時都好鍾意莫琪琪。

雨： 「鍾意」？係呀，我哋嗰時好鍾意佢。記唔記得呢隻G Shock呀？我哋嗰時三個人輪流排咗幾晚通宵先買到。

雷： 係囉，但買咗之後佢又唔戴。

雨： 佢緊係戴唔到啦。仲有呢個髮夾，嗰陣中二乜都唔識，三條友厚住臉皮入旺中去揀，俾人笑到仆街。

雷： 但佢又係無戴過。

雨： 仲有好多好多嘢，我哋送俾佢，佢最後都無用。

雷： 咁…做兵係咁架啦。

雨： 但正常人真係會咁咩？正常收到禮物嘅女仔「詐架E」都會戴出黎俾人睇吓掛？好多嘢仲要唔平架喎。

雷： 咁佢係女神嘛，所以佢唔稀罕啫。

雨： 掂都唔掂一吓？呢度無一樣嘢有過俾人用過嘅痕跡喎。

雷： 唔通，全部都係阿風再新買嘅？

雨： 你估佢開金礦咩。我想講嘅係…

雷： 係？

雨： 莫琪琪從來就無存在過。

雷： 你到呢個時候仲講埋啲咁嘅嘢？

雨： 我諗通咗架啦。呢啲嘢都只不過係我哋細個嗰陣嘅FF。每個人都曾經有一段時間會好憧憬啲好美好嘅嘢，啫係大個咗之後你一定會成為一個好出色嘅人，會有好多人喜愛，個世界會好好，無紛爭，好和諧，或者無論你幾平庸幾普通都好，一定會有一個又靚又身材好好嘅女仔對你死心塌地，仲要係處。又或者…又或者幻想一個靚女，一個女神，就喺我哋身邊，照耀住我哋平凡沉悶嘅日子。不過行雷，我哋大個架啦，呢啲美好嘅想像我哋唔應該再有。不過我都覺得你做得好好，我指你識咗個女朋友，我都好應該學吓你。

雷： 你訓醒未呀？

雨： 我好精神呀。

雷： 點解到呢個時候你都可以咁長篇大論咁去講啲咁荒謬嘅嘢呀？

雨： 我無呀。

雷： 無？個現實係而家連阿風都失埋蹤呀！定係你覺得連佢都係我哋FF出黎架？

雨： 我會積極咁考慮吓呢個可能性。

雷： 喂唔好意思，我真係好想問吓你癲夠未！你唔可以次次一遇到啲唔順心嘅嘢就選擇逃避唔理架？而家阿風係我哋嘅舊同學，琪琪係我哋嘅女神，我知我哋面對嘅對手好恐怖，但都唔可以一下子否定哂我哋一直堅持緊嘅嘢架！

雨： 無可能。

雷： 咪係囉！

雨： 阿風無可能係我哋FF出黎，因為我真係諗唔通佢有咩理由要出現喺我美好嘅幻想入面，咪住先，定係我需要一個競爭對手呢？

雷： 雨仔？

雨： 但競爭對手已經有一個行雷唔係已經夠啦咩？

雷： 喂？

雨： 咁唔通呢度啲嘢又係我無意識咁整出黎？

雷： Hello？

雨： 無理由丫，我又唔係開金礦嘅。

雷： 喂！！！

雨： 電話！！！

雷： 吓？

雨： 點解你今日電話唔響嘅？

雷： 關你咩嘢事？

雨： 嗌咗交？

雷： 係又點？

雨： 為咗莫琪琪？喂，唔該你咁大個人分吓輕重啦。唔好為咗個根本唔存在，又或者就算存在都唔係好關你事嘅人搞成咁啦。你記唔記得佢鍾意咩呀？佢要啲好大隻嗰啲嘛。所以佢嗰日先喺度俾Jason屌啫嘛！

（一靜）

雷： 我哋無嗌交，只係冷戰啫。

雨： 咪一樣。

雷： 因為我仲未諗到應該點樣同佢講琪琪嘅嘢，諗到之後我就會同佢好返。

雨： 咁咪好囉。大方啲同佢講一切只係你童年嘅幻想，咁就無事架啦。

雷： Jason…

雨： 嗯？

雷： 你係咪想講連Jason都係你幻想出黎架？你點會無啦啦幻想條友屌自己女神？

（一靜）

雨： 我諗我都係走先。

（雨想離開的時候撞到櫃，跌出一個藍罐曲奇樣子的禮物）

雨： 呢個…

雷： 點解佢會喺度嘅？我明明掉咗。

雨： 阿風個痴線佬好鍾意執垃圾架嘛。

（雷拾起禮物，打開罐子，入面是一塊木框鏡子，木框上刻著”The reason my39heart beats”）

雷： “The reason my heart beats”，成份禮物最難諗就係呢句嘢。Last Day嗰日，都係琪琪嘅生日，嗰日我準備呢份禮物係同以往嘅禮物唔同，因為今次我諗住同佢表白。不過講真丫，一個無鍾意過你嘅人又點會無啦啦收到份禮物，打開見到塊鏡就鍾意你先得架。但就算只係億萬分之一嘅機會都好，嗰一刻我都希望過佢可以做我女朋友。“The reason myheart beats”，就算呢一刻我已經有新嘅對像，但我都唔可以否定以前嘅自己。

（一靜）

（風入，他一入場就找東西）

雷： 阿風？你終於蒲頭！

風： 緊係啦，今日係咩日子呀？今日係琪琪生日嘛！我今晚就要帶佢返屋企！！你哋跟唔跟我黎？

（三人對望，雷跟風走，剩下雨一人在機地內，稍為收拾東西時發現一樣東西，後跑走。場內響起《護花使者》的音樂，燈轉）

（回憶片段：三人營救琪琪）

（穿著校服的雷入）

雷： 琪琪！我黎救你啦！

（穿著校服的風雨入）

風雨： 琪琪唔洗驚！

雷： 你哋都黎？

風： 無人可以掂我對車頭燈！

雨： 人多好辦事！

（三人隨著《護花使者》的音樂起飛腳，格開鄰校男生，最後三人背對背圍著不存在的琪琪退場）

（時間再跳到Last Day時）

（雨拿著禮物入，滿心歡喜走去後山）

（雷拿著禮物，練習送禮時，風入來，撞個正著，二人對峙，想搶對方的禮物阻止對方送禮）

（雨跑入）

雨： 嗰…嗰面，呀！！！

（雨走，走時掉下禮物）

（風雷即時跑去後山，雷回來）

（雷想怒摔禮物但又不捨，將禮物放在一旁就走）

41（風入來，樣子有點錯愕）

（現在的雨入來，帶著一個箱子，看著風平息自己的心情，風拾起在地上的禮物後離去）

（回到現在）

（雨打開箱子，拿出一些電線，燈暗）

第五幕

（於出發的路上）

雷： （錄Whatsapp語音訊息）講到呢度，你應該估到我今晚要去邊。但請你相信我，我真係唔再鍾意莫琪琪。喺我心入面，就只有你一個。之不過，我唔可以否定以前鍾意佢嘅我。如果我選擇忘記以前嘅自己，我又點去愛你？我希望你能夠明白。

（風出）

風： 點呀，終於錄完遺言嗱？

雷： 啋過你！我決定Settle咗呢件事之後就同我女朋友結婚架啦。

風： 你小心啲講嘢呀，通常講完呢啲嘢嘅人，最後都返唔到屋企。

（一靜）

（風拿出頭盔）

風： 琪琪十三歲學踩單車嗰陣用嘅頭盔。正話返去就係諗住摷俾雨仔用，保護佢個雨頭。而家俾你啦。

（風為雷戴上頭盔）

風： 嗯，而家終於似返隻兵。

雷： 我都話咗我唔係兵囉！

43（雷想除低頭盔，但被風阻止）

風： 千祈唔好除，你永遠唔知道我哋面對緊嘅嘢係咩，如果無準備就上嘅話等於送死。

雷： 咁你又唔戴返啲嘢？

風： 我有琪琪對我嘅祝福唔會有事嘅…同埋琪琪剩係學咗一次單車，所以我得一個…我知你係我夾硬拉過黎嘅，我唔想你有事。

（一靜）

雷： 事到如今仲講咩吖？我唔係兵…你就當係借兵囉，總之我哋今晚共同進退。

風： 好！

雷： 其他人而家喺邊？

風： 其他人？

雷： 係呀，你之前喺地下網絡聯絡嗰班人。你話你哋一齊去走勻成個城去搵線索架嘛，佢哋今晚都黎架可？

風： 黎！緊係黎啦！我約咗佢哋九點半，應該差唔多到架啦。

雷： 好，我哋加埋有幾多人？

風： 好多人！

雷： 咁就好啦！

（電話響）

雷： 我去聽個電話先！

風： 好。

（雷走，風鬆了口氣，雨入）

風： 你點知我哋喺度架？

雨： 你估我真係白痴咩？你可以去得邊吖？

風： 你黎幫我哋手？

雨： 佢知道咗未？

風： 知道咩？

雨： 根本唔會再有其他人，由始至終只得你一個。

風： 你喺度講咩呀？

雨： 我喺東張西望見到得你一個人拉住著Banner遊街。

風： 我咪叫咗唔好信個電視台講嘢囉！

雨： 然後我又手痕上網搵你所謂嘅地下網絡，根本就無啲咁嘅嘢。

風： 你識條鐵咩？個網絡收得好埋架！

雨： 有幾埋？

風： 都…地下三四千米？

雨： 你個地下網絡真係喺地底下面？

風： 緊係啦！唔係做乜叫地下網絡呀？

雨： 夠啦，雖然我不嬲都知你係野人咁嘅款，但你啲大話其實可以講得叻啲。如果你唔識嗰啲嘢，就唔該你Search吓先講啦。

風： 我唔知你講咩，總之我嗰啲係喺地底下面嘅！

雨： 我翻轉哂七大洲五大洋嘅網絡，連Deep web都搵埋，都唔見你嗰啲復仇者聯盟。

風： 係你唔夠班搵唔到啫！

雨： 你係咪想害死行雷呀？

（一靜）

（雷入）

雷： 雨仔？你又黎一齊去？

風： 你唔好亂講嘢呀。

雨： 係呀我係黎同你講，阿風佢真係瘋言瘋語，你等緊嗰啲人唔會黎，因為係佢吹水吹出黎嘅。

雷： 我都估到架啦，嘩飛碟呀！（雨望另一方向）

雨： 係？

（雨走）

雷： （對風）雨仔嗰啲乜春集體幻覺又黎啦。

風： 係囉係囉。

雷： 今次我哋一定要佢知道佢係錯嘅，當眾屌醒佢，幫佢戰勝佢嘅創傷後遺症！咁佢先肯面對現實。

風： 緊係啦緊係啦。

雷： 咁樣佢就會覺醒。

風： 好呀！但係我哋要點做呢？

雷： 陣間你啲人黎到，咪變相打咗佢一巴囉！

風： 啲人黎到再打佢一巴？

雷： ...總之我哋先順住佢講嘅嘢，留住佢個人，等佢親眼見到你隊兵黎到佢就醒架啦。你啲人幾時黎呀？

風： 好快即將就到。

（雨入）

雨： 都無嘅。

雷： 可能我睇錯咗個月光呀。

雨： 我頭先話呢條友仔吹水，根本就唔會有乜嘢幫手過黎，就得佢一個人。

雷： 係囉，我都係咁話。你人少少就認咗佢啦。

（雨雷望著風，雷對風打眼色，風吸了一大口氣）

風： 係，無錯，拉Banner又好，走訪唔同區又好，夜晚守到天光，喺度扎營，全部都係我一個人做嘅。

雨： 嗱係咪呀！

雷： 係囉，我都係咁諗。

雨： 點解你要咁樣做呢？

雷： 係囉，點解你要咁樣做呢？（狂打眼色）

風： 因為…因為…因為我驚。琪琪俾飛碟吸走嗰晚，我訓唔著教。第二朝出到街，我好驚，好多人不停咁提飛碟嘅嘢，嗰個畫面不停出現喺我個腦入面，揮之不去。嗰晚，我都係訓唔著。第三日，我唔敢出街，因為我好驚會再聽到其他人提起飛碟、UFO，乜叉都唔想聽。但人係犯賤嘅動物。我開始上網搵相關嘅資料睇，嗰陣係真係有一個「復仇者聯盟」架。

如是者我又睇咗成個禮拜，好記得係第九日嘅朝早九點三十八分，所有有關嘅字眼正式俾人block哂。我嗰陣好驚，我好驚係我部電腦上唔到網。我即刻走落街去搵網吧。第一間，搵唔到我想搵嘅嘢，第二間又Search唔到，然後我就去搵第三間。

我真係好撚驚。因為我突然發現身邊已經無人再提起嗰晚嘅嘢，甚至乎近啲但細規模啲嘅事件都無人講。佢哋連宵禁都唔當係一回事。「咁咪可以準時收工，早啲返屋企囉！」我真係好撚柒閪驚。我好驚原來係得我一個人喺現場。

喺嗰時我開始用盡我所有嘅方法，去搵人幫手，我真係好想籌集一隊軍隊，去打飛碟，救返琪琪。所以我周圍遊街，企街，拎住Banner，搵返你地。

其實我真係好驚呀！好驚會俾飛碟吸走，好驚夜晚晚出街會俾人打，俾人拉，宵禁吖嘛。我好驚每次出街，企喺街頭嘅時喉，行過嘅人奇異嘅目光，佢哋好似當正我係癲佬咁！我平時孭住兩枝旗出街最多俾人笑吓，但我打開條Banner，企喺下面叫啲人簽名支持吓，佢哋覺得我好似想殺咗佢咁！喂！我唔係為咗自己一個架喎！而家俾飛碟吸走嘅唔係我，係你或者佢或者所有人身邊嘅人，我只不過係企係佢哋面前搬個事實出黎啫？點解要當我係一個怪人？係咪因為我夠膽做啲佢哋好想做而又無膽做嘅嘢呀？我真係好驚呀，我驚我先至係錯嗰個。我驚我應該要好似佢哋咁當無嘢發生過咁繼續生存喺呢度，我好驚我會變成一個行屍走肉嘅人！但我最驚嘅係會無咗我嘅女神，無咗琪琪...

（風越說越聲淚俱下後一靜）

（雨雷相繼拍手）

雷： 我而家先知你咁好戲。

雨： 一早肯咁講咪好囉，不過我都無資格話你。我之前都係一直喺度逃避緊，全靠行雷罐藍罐曲奇我先至搵返自己，我仲喺你個秘密機地搵返我當年嗰份禮物添。

雷： 入面係裝咩架？

雨： 關你咩事。

風： 唔好意思呃咗你哋出黎陪我送死。

雨： 千祈唔好咁講，保護女神，人人有責。

雷： 況且我哋陣間會有援軍架嘛！

（一靜）

風： 呀，你正話女友打黎有無詐你型呀？

雷： 講開又講，正話傾傾吓斷咗線…呢度幾時有咁多星星架？

（一靜）

（飛碟出現，發出強光）

風： 其實有啲嘢我正話唔記得講。有一晚我真係試過近距離見到飛碟，雖然我睇唔出佢黎自邊度或者佢係咩嘢樣，但我好肯定渣飛碟嘅一定同我哋一樣，都係地球人。

（風雷雨三人躲起來，探出頭，雨戴上頭盔）

雨： 咁先似返隻兵嘛。

雷： 咁點解佢哋要吸走我哋啲人呀？

風： 我都唔知呀，不如你出去問下佢？

雨： 咁而家點呀？

雷： 我哋不如等援兵黎咗先？

雨： 你聽唔到佢頭先講咩？唔會有援兵架啦！

雷： 其實佢正話做戲架咋，阿風？

（一靜）

（風突然發難想衝出去，雷雨上前與他糾纏，混亂間被飛碟上的人發現，一道強光打在他們身上，他們停止糾纏，舉手作投降狀）

雨： （小聲）咁而家點呀？

雷： （小聲）拖延時間，等救兵黎。

雨： 都話咗唔會有架囉！

風： （大聲）廣東話你哋聽唔聽得明？［國語］你們聽得懂嗎？Do youunderstand?

雷： 你喺度做咩呀？

風： 試吓同佢哋講數，可能佢會放返琪琪走呢？

雨： 我哋黎唔係想同你哋做武力抗爭，雖然我哋戴哂頭盔，但我哋無武器喺身，我哋係無惡意嘅！

風： 我剩係想你哋放返大概一個月前吸走嘅一個女仔，佢叫莫琪琪，英文名Maggie，扎馬尾，樣子甜美，小背心，大波，波邊有粒墨，三圍係…

雷： 總之請你放咗佢啦，如果唔係嘅話…

雨： 唔係嘅話…

風： 唔係嘅話，我哋就喺度靜坐抗議，直到你放走佢為止！

雨： 你唔係呀嘛？我都戴哂頭盔過黎，你剩係諗住坐喺度？

雷： 有無啲實質啲嘅嘢呀？

風： 加埋絕食！

雨： 絕食有鬼用咩？

雷： 你估佢係你阿媽呀？

風： 我哋做嘢要有啲階段嘅，無理由一步登天架嘛，陣間架飛碟俾我地嚇走咗，咁咪跟甩條線索囉！

雨： 咁但係我哋講咗咁耐佢聲都唔聲吓喎！不如我哋諗辦法入飛碟啦！

雷： 點入啫，而家我哋都黃咗，咁多隻眼望住哂！

風： 總之我哋坐吓先啦！

（三人坐在地上，一靜）

風： ［唱］這晚在街中偶遇心中的她…

雨： 噓！你做乜鳩呀？

風： 唔知點解一坐低就好想唱歌！

雨： 正經啲啦！（站起身，對飛碟）我呢度有個炸彈，你唔放佢我就掟去你度！

雷： 你運用你嘅爆石工程知識整咗個爆石炸彈？

風： 勁呀！

雨： 我數三聲，三…二…一！

53（一靜）

風： 無料到喎。

雷： 掟佢啦！

雨： 唔得！

風： 點解呀？

雨： 一掟會炸埋我哋自己。同埋其實我未整好。

（雨坐下）

雨： ［唱］這晚在街中偶遇心中的她…

雷： 你又黎？

雨： 原來坐低真係會好想唱歌。

（一靜）

（風雷雨慢慢唱起《護花使者》，越唱越大聲越high，站起身手舞足蹈，不斷loop，跳廣場大媽舞）

（在周圍傳出不同人聲和唱著，好像有千萬人包圍住這山頭）

雷： 援軍到啦！

雨： 點解嘅？

風： 你見到啦！我哋呢度所有人都係俾你哋搞到嘅人，因為你哋，我哋失去咗好多嘢！

謎之VO：土地...福利...權利...自主...

風雷雨：女神！

風： 就算你想拒絕我，但我哋呢度有咁多人，你又可以無視我哋嘅訴求咩？

雷： 喺我哋搞大佢之前，你最好乖乖地交返莫琪琪出黎！

雨： 如果唔係我哋呢度一人一舊石頭掉落你度都幾過癮架！

風： 唔用石頭就用拳頭！

雷： 唔用拳頭就用…頭！

雨： 總之就一定要拎返屬於我哋嘅嘢為止！

（一靜）

（突然飛碟發出痾屎聲音，莫琪琪被飛碟痾到地上）

（風雷雨三人看見琪琪，大喜）

琪VO： 好多謝你哋救返我呀，我要做哂你哋嘅女朋友！

風雷雨：YEAH！

（風雷雨三人互相擁抱，跳起YEAH，狂歡，動作漸細漸慢漸定格）

（東張西望主持出）

東： 根據拍攝到嘅片段，喺晚上，三名男子喺街頭互相擁抱後突然離奇死亡55，原因未明。警方呼籲各位市民，宵禁期間切勿外出，避免發生意外。轉頭返黎，東張西望再為大家分析集體幻覺嘅成因...

（燈暗）

尾聲

（燈持續暗著，零聲響起一連串Whatsapp Msg的聲效，先疏後密，慢慢插播和唱版本的《護花使者》副歌，連聲腳步）

全劇完