天運號 (The Fortuna)

In 1979, the Fortuna, carrying over 2,600 Vietnamese refugees, entered Hong Kong waters. The government intercepted the cargo vessel and refused its request to dock; the refugees were stranded at sea for four months.

Original Work (原文)

《天運號》 編劇：張雁華

第一場

【雷雨聲中，夾雜著海浪拍打船隻的聲音。】

【船上人聲吵雜。】

【一把沙啞的男人聲線，正在唱票。】

旁白： 醫生一票，醫生一票，醫生一票，陳福一票，黎伯一票，副船長一票，副船長一票，醫生一票，陳福一票，阮氏紅一票⋯⋯

第二場

旁白： 1979年，一艘載住2600個越南難民嘅貨船「天運號」，喺越南出發，先後登陸菲律賓，被當地政府驅逐之後，二月駛入香港海域。港英政府當然冇咁順攤啦，派出水警攔截貨船，唔畀班難民靠岸，兩千幾人被迫喺海上滯留足足四個月。

始終再等落去，都唔係辦法，於是船上嘅人決定用投票嘅方式，揀選去五個人，代表呢二千幾個難民，去商討一個方案，解決呢個僵局。

【五人的腳步聲。】

旁白： 呢五個人將會喺船艙嘅駕駛室開會，分別是醫生、後生仔陳福、副船長、黎伯和阮氏紅。最後一個行入去嘅係阮氏紅，佢停喺艙門前，猶疑不決。

阮氏紅： 我都係唔放心。

黎伯： 去邊啊你？

阮氏紅： 阿叔，你做下好心，唔好攔住我。嗰仔唔喺側邊，我個人就囉囉攣。

黎伯： 而家唔係講玩，出出入入，你當自己屋企啊？

阮氏紅： 一係畀佢坐隔離，佢好乖，唔會亂插嘴㗎。醫生，你見過阮明，佢好乖㗎，你話係咪？

醫生： 我哋大家都冷靜小小，阮大姐，我哋呢個係閉門會議，唔方便有其他人。我知你心掛掛，之不過阮明有其他太太幫手睇住，萬一⋯⋯我係話萬一，有啲咩事，佢哋會入嚟通知我。阮明食咗藥都要休息，我哋早啲開始早啲完，仔仔瞓醒咪即刻見到媽咪。

阮氏紅： 我一個女人仔……

陳福： 我哋呢度就係差咁個女人，揀你嘅人一定有啲嘢，係想你代表女人講幾句。如果你唔想開口唔緊要，舉手投票都得。

阮氏紅： 後生仔，我咩都唔識㗎⋯⋯

【副船長走到艙門附近，艙門被關上的聲音。】

副船長： 大家坐埋一齊，唔好掂到啲「制」。早啲傾完，等阮氏返去湊仔。

旁白： 阮氏紅望住身後嘅門被副船長刪埋，唯有靜靜坐低。後生仔陳福喺側邊拍拍佢膊頭。大家圍住駕駛艙入面嘅枱，坐埋一齊。醫生坐喺中間，副船長同黎伯坐喺兩邊，阮氏紅同陳福就互相對住。呢場關乎人命嘅討論，就係咁揭開序幕。

醫生： 好，我哋每個人都講吓⋯⋯

副船長： 【打斷】醫生啊，既然要講，不如我講先。先小人後君子，有啲嘢我要事先講明。一、我唔同你哋，我唔係走難，有咩事，我係唔會同你哋共進退。二、收你哋錢嘅係船長，你哋啲黃金喺佢度，我只係打份工㗎啫。

陳福： 之但係副船長你嘅決定，唔淨止影響你自己，仲有大家嘅集體利益。

副船長： 啱啦，後生仔！呢個亦都係我想講嘅第三點，我冇爭住做出頭鳥，係你哋嘅人揀我出嚟，「代表」呢個名係你哋呃落我度。同埋最後一樣，而家船長畀你哋嘅人挾持，如果隻船有咩問題，要整、要賠，我係唔會孭飛。如果大家聽完，覺得唔啱嘅，我就至多唔出聲，等到夠鐘就出返去。

阮氏紅： 【嘆息】大家坐埋同一條船⋯⋯

醫生： 【打圓場】副船長幫咗我哋咁多，之前拆個燃油缸畀大家煲粥水食，等班細路唔使挨餓，我哋好多謝你。所謂幫係人情，唔幫係道理，肯幫手我哋感激，想低調啲嘅我哋都諒解。

副船長： 多謝就免啦，我做人好實際，有嗰句講嗰句。

醫生： 副船長講咗佢嘅唸法，大家如果有咩其他嘅擔心，都可以輪流講下，順便介紹埋自己，講下點稱呼。

黎伯： 仲介紹啲乜啊？佢係副船長，你就係救苦救難嘅醫生，加埋個專門搞事、搏出位嘅𡃁仔陳福。呢度得我同大姐係啲冇人識嘅蟻民。我講先，本人黎亦雄，行不改名，坐不改姓，呢度仲講尊卑輩份嘅，就叫聲黎伯，我都仲受得起。大姐，到你啦。

阮氏紅： 叫我阮氏紅就得啦，我有個仔叫阮明，今年十四歲，多得醫生之前救返佢。我講嘢唔叻，大家包容啊。

黎伯： 好！直接入正題。

陳福： 等陣。

黎伯： 又點啊？陳福。

陳福： 開始之前，我提議所有討論都必須保密，包括投票都要匿名。

醫生： 呢個建議的確好，如果開名，大家就唔敢出聲。

眾人： 好啊⋯⋯應該係咁⋯⋯

黎伯： 【打斷其餘四人】唔得！到時死咗人，咪又冇人負責。

【沈默。】

【陳福率先開口。】

陳福： 黎伯，以前嘅事，你要怨我，我都冇辦法。一百個人跳船，冇錯係一個集體行動，但每個人都係用自己嘅自由意志去做決定，你嗰仔都唔例外，佢要為自己嘅行為負責⋯⋯

黎伯： 唔係你提出，我嗰仔會跳落海？初初就話全體，而家就你死你事，你陳福命大，我黎亦雄而家冇仔送終。

副船長： 你哋啲婆婆媽媽嘅私人恩怨，我唔理。行船咁多年嘅經驗話我知，想要前行，就唔好向後望。既然你哋都冇晒退路，剩低可以做嘅就係合作。

黎伯： 好，你哋話唔開名，咪唔開名囉，到時大難臨頭，後果自負。

副船長： 無論點，以前嘅嘢已經返唔到轉頭，但至少切斷錨鏈呢件事上面，你哋一定要達成共識。做定唔做，出面兩千條人命就睇你哋。

醫生： 冇錯，兩千幾條命，有啲救得返，有啲救唔返，但係剩低嘅，我想救到幾多得幾多。

【沈默。】

阮氏紅： 如果真係切斷錨鏈，會點㗎？

旁白： 阮氏紅問完，大家都唔敢出聲，就連最專業嘅副船長都冇開口。醫生望左副船長一眼，就答阮氏紅。

醫生： 會傾側、或者喺海面漂流，趁住漂流，就有機會靠岸。主要係視乎當日嘅風向，同埋海面情況。

黎伯： 即係等到好天嗰日郁手，我哋就有機會埋岸啦？

醫生： 可以咁講。

【沈默。】

阮氏紅： 副船長？

黎伯： 呢度你最熟，你幾大都up個頭，出句聲。

副船長： 埋岸的確係有可能，不過實際係點，就好難講⋯⋯

醫生： 如果計算吓天氣嘅因素⋯⋯

副船長： 冇人知，切斷錨鏈嘅後果冇人知。

醫生： 我哋有機會上岸。

副船長： 呢個係假設，最壞情況係成㗎船沉晒落海。

黎伯： 沉船？喂，咁大㗎船沉晒，我哋啲老坑咪等死。

阮氏紅： 仲有咁多細蚊仔，一家大細，有老有嫩，好多都唔識游水㗎喎⋯⋯

醫生： 大家又唔使咁擔心，只要我哋計啱個風向，加埋副船長肯幫下手⋯⋯

副船長： 【打斷】海係天，天係冇得預測。

【沈默。】

阮氏紅： 醫生，既然副船長都咁講，咁危險，真係搏得過咩？

陳福： 【打斷】我認同醫生嘅講法。切斷錨鏈係我哋最後、同唯一嘅機會。

黎伯： 陳福，今次唔同之前啊。上次跳海，我嗰仔浸死，你話佢自願跳嘅。

得，我拗唔贏你。但若果今次出事，係全村人一齊陪葬㗎。

陳福： 你哋仲唔明我哋而家嘅處境咩？政府係唔會同情我哋㗎。【一頓】我哋做左咁多嘢，絕食、跳海、求佢、兇佢⋯⋯乜都做齊。等落去，唔知等到幾時。

黎伯： 等，至少可以保住條命⋯⋯同你一齊跳海嗰班𡃁仔，咪又係畀水警捉返嚟，你唔好唔記得，有人返唔到嚟。

陳福： 如果有日政府斷水斷糧，我哋點啊？如果佢有日用槍頭指住我哋，逼我哋走，咁點啊？上岸，先有機會留低。

阮氏紅： 唔使下下都咁激進嘅。上次醫生提議絕食，之後啲伙食仲好咗啊，我哋隔一排再試吓⋯⋯

陳福： 【語帶諷刺】絕食完，伙食好咗喎，遲啲可能仲有鮑參翅肚添。

阮氏紅： 【尷尬】我都係有嗰句講嗰句啫。

醫生： 阮大姐，陳福唔係咁嘅意思。絕食已經係我嘅最後一著，但係輿論呢啲嘢，大家當睇場表演，湊完熱鬧就算，過咗幾日已經冇人記得。我當然都覺得好心淡啦，但事實就係，絕食改變唔到任何政府嘅決策。

我認同陳福，割斷錨鏈係冇辦法之中嘅辦法。再加埋好快就六月，萬一打風，留下船上就更加危險。希望黎伯、阮大姐你哋都明白，如果真係實行呢個計劃，我哋都會睇點樣照顧老人家同小朋友，令大家可以安全著陸。

副船長： 我對切斷錨鏈好有保留，但如果你哋決定咁做，我會叫船員，睇下點樣配合。

醫生： 或者大家都靜靜地唸下，跟住我哋就投票啦。

阮大姐： 嗯⋯⋯唸多下先⋯⋯

旁白： 於是乎，五個人各自坐埋一邊，唸咗一陣，就將佢哋嘅意向寫係一張紙仔上面，再放入一個密封嘅盒。

醫生： 支持一票、反對一票、反對一票、支持一票【一頓】最後⋯⋯

【一記響雷，接續大雨連綿的聲音。】

第三場

旁白： 投票過後，呢班難民照常係船上生活，繼續漫無止境咁等落去。直到一日，黎伯竟然主動召集一個會議，叫齊五人小組，再次嚟到船艙嘅駕駛室。

【關上船艙大門的聲音。】

醫生： 黎伯，你係咪改變左唸法，先叫我哋嚟？

陳福： 大家都見啦，呢個星期照舊病嘅病，餓嘅餓，好多人都開始不滿，大家都唔想等落去。

黎伯： 陳福你果然係好關心大家，連人地不滿，你都知得一清二楚。

陳福： 黎伯，你叫齊咁多人，有咩就照直講，唔好喺度單單打打。

黎伯： 好啊，竟然今日係我叫齊大家嚟開會，咁就我講先。上次投完票，大家集體決定唔割錨鏈，但陳福暗地裏夾埋幾個死𡃁仔，唸住自己郁手。

陳福： 呢個係你片面之詞。

副船長： 我嘅船員已經同我講咗，你問佢哋借咗幾把鋸。

陳福： 咁又證明到啲咩？

黎伯： 哇，想死口不認啊？你以為啊⋯⋯

阮氏紅： 【哭哭啼啼】唔好意思，我知大家講緊正經嘢，我都唔想阻住你哋。

但係我呢排真係冇心情，今次真係幫唔到大家啦。

醫生： 我哋都唔希望勉強你，節哀順變。

黎伯： 我明你心情，我嗰仔死嗰陣，我都係咁。你話我哋啲老坑，都半隻腳踩左入棺材，去邊唔好啊。咁搏命，咪又係為左啲細路⋯⋯

阮氏紅： 醫生你千祈唔好咁講，你幫左我哋兩仔乸咁多，冇你，阮明邊到捱到今日啊。都係整定㗎，一個人有幾多福氣，享受到幾多，都係個天話事。遇著你，我哋已經好好彩。

醫生： 千祈唔好咁講。

黎伯： 醫生，你唔使喺度演好人啦，關心呢個，關心嗰個，我睇怕你都係半斤八兩，一擔擔㗎咋。陳福雖然唔講承諾，但醫生都一樣唔執輸㗎，拉埋啲船員枱底交易，夠晒自私自利，你話係咪啊醫生？

阮氏紅： 黎伯，你冇證冇據，千祈唔好亂講。

醫生： 阮大姐，等我解釋畀黎伯聽啦。前排有病人，所以我用自己嘅黃金去換咗啲乾糧畀佢。我明白呢啲私下交易係唔應該嘅，但係個病人情況好危急，身體已經好虛弱，再唔補充營養，可能⋯⋯【一頓】唉，我冇晒辦法，唯有出此下策。

阮氏紅： 醫生都係好心⋯⋯

黎伯： 【打斷】閘住！咁晤見咗嗰件救生衣，唔知醫生你又係送咗畀邊位病人啊？

醫生： 救生衣？我唔知你講緊咩。

黎伯： 副船長，不如你講下船上嘅物資係點分配？

副船長： 所有船上嘅物資都會存放喺倉庫，而且有船員負責定期點算。而且所有人出入倉庫都要登記，任何物資有缺漏，只要翻查紀錄，就可以知道係咩人所為。

黎伯： 簡單啲講，我淨係想問醫生，將嗰件救生衣送咗畀邊個病人呢？

醫生： 只係不時之需，放住喺度。

阮氏紅： 因乜解究，要救生衣啊？

黎伯： 咁就要講返啱啱陳福背住大家搵鐵鋸。割開錨鏈，隻船唔知飄去邊，自然就要救生衣保命啦。

醫生： 咁上星期，黎伯你突然發燒，唔食我開嘅藥，堅持上岸又係為啲乜？

陳福： 睇怕係詐病，趁住去醫院嗰陣，就想收買警察，借啲意上岸咋。

黎伯： 我嗰陣同阮氏紅嗰大仔阮明一齊上岸。

陳福： 但而家死無對證，你講乜都得。

醫生： 黎伯，你又畀咗幾多錢畀副船長，要佢畀你睇物資紀錄啊？

副船長： 你哋嘅事，你哋自己傾掂數。

陳福： 副船長，你既然講到所有物資進出都有紀錄，你又點會唔知呢啲幕後買賣？全部嘅救生艇、救生衣都把控喺你手上，只不過係價高者得，邊個有錢就賣畀邊個啫。

阮氏紅： 夠啦，大家都唔好嘈啦，有邊個唔係顧住自己條命先得㗎⋯⋯我明㗎，你哋有幾個錢，又讀得書多，識為自己打算。但大家話晒都坐埋同一條船，條錨鏈切唔切又點，到時邊個死咗，邊個冇事，咪又係嗰天話事。我哋全部人都係賤命一條，聽天由命。只不過，大家聚埋一齊，至少有個照應。

【此時，外面傳來敲門聲。】

阮氏紅： 等我去睇下。

【響起匆匆的腳步聲。】

阮氏紅： 夠鐘食飯啦，政府啲飯盒送到左，大家食飯先啦，食飽再算。

黎伯： 有飯落肚，就至緊要。

阮氏紅： 豬皮、肥豬肉、雞翼尖⋯⋯以前舊肥豬肉梗係留畀嗰仔，而家終於有得食

醫生： 我上船接啲病人，聽出面啲人講，呢啲係香港叫皇家飯。

黎伯： 哇，我地咁威啊。

陳福： 皇家飯即係阿公請嘅，唔使錢，即是話係監躉食嘅。

黎伯： 人賤，就命賤。食乜，仲有有乜所謂啊。

阮氏紅： 哇，監躉都咁好餸，到左香港仲愁冇得食啊？

黎伯： 我地未上岸都食到，埋左岸囉，山珍海味、乜都有⋯⋯

阮氏紅： 副船長，你行去邊啊？

旁白： 副船長行去艙入面一個緊鎖嘅木櫃，拿咗支酒出嚟。大家輪流傳咗一圈，每人一啖，特別暢快。

黎伯： 副船長咁大方啊？

副船長： 六月好快就打風，到時我哋就危危乎啦，唔趁有命飲，唔通等到死咗奠酒先嚟飲啊？

【黎伯和陳福同時笑出聲。】

副船長： 笑咩啊？呢支好嘢嚟㗎，唔趁而家飲，遲啲打爛就冇㗎啦。

【阮氏紅和醫生也相視而笑。】

阮氏紅： 副船長，你啱啱話我哋⋯⋯

副船長： 啱啊，我哋⋯⋯【想了想】係啦，我哋⋯⋯可以繼續未？

【風浪聲。】

【全劇完。】